Qazaqstandaǵy ýran qory qansha

ASTANA. QazAqparat – «QazAtomÓnerkásip» ulttyq atom kompanııasy» aktsıonerlik qoǵamynyń kommertsııa jónindegi bas dırektory Asqar Batyrbaev Reseıde ótip jatqan «ATOMEKSPO-2022» atty halyqaralyq forýmda Qazaqstan ýrany ekologııalyq turǵyda taza tehnologııamen óndirilip jatqanyn aıtty, dep habarlaıdy QazAqparat tilshisi.

«Ýranǵa suranys artatynyn, kóptegen reaktordyń qurylysy josparlanǵanyn eskersek, «QazAtomÓnerkásip» kompanııasy qol qýsyryp otyrmaıdy. Biz keıingi 10 jyldaǵy eń iri óndirýshi bolyp eseptelemiz. Bizde ekologııalyq turǵyda eń taza tehnologııa qoldanylady – jerasty uńǵymasynda shaıý tásili», - dedi Asqar Batyrbaev.

Kompanııa ókili eldegi barlanǵan ýrannyń qory týraly málimet keltirdi.

«Qazaqstanǵa álemdegi ýrannyń 12 paıyzy tıesili. Bul kórsetkish boıynsha ol álemde ekinshi orynda. Barlanǵan ýrannyń kólemi - 625 myń tonna, al jalpy qor - shamamen 785 myń tonnadaı. Qazirgi óndiris qarqyny saqtalsa, bul qor ýran óndirisiniń kólemin 2021 jylǵy deńgeıde 30 jyl boıy saqtap turýǵa jetedi», - dep atap ótti «QazAtomÓnerkásip» ókili.

Asqar Batyrbaev Reseı Federatsııasynyń Sochı qalasynda ótip jatqan «ATOMEKSPO-2022» halyqaralyq forýmynda onlaın-kórsetilim arqyly sóz sóıledi.