Qazaqstandaǵy ýnıversıtetterdiń róli artýda
MÁSKEÝ. QazAqparat - Máskeý qalasynda Reseı halyqtar dostyǵy ýnıversıtetinde álemniń 400-ge jýyq jetekshi ýnıversıtetteri ókilderiniń basyn qosqan «QS Worldwide» atty ekinshi halyqaralyq forým-kórmesi bolyp ótti.
Qazaqstandyq JOO-nyń ǵalamdyq ǵylymı jáne bilim berý keńistiginde ósip kele jatqan rólin eskere otyryp, QS atqarýshy keńesi kezekti forýmdy Qazaqstanda ál-Farabı atyndaǵy QazUÝ-dyń negizinde ótkizý týraly sheshim qabyldady.
«QS Worldwide» - brıtandyq «QS» reıtıngilik agenttigi ótkizetin bedeldi halyqaralyq is-sharalardyń biri bolyp tabylady. Forým joǵary bilim berýdi damytý perspektıvalary, álemdik deńgeıdegi ýnıversıtetterdiń qalyptasýy, ınternatsıonaldandyrý jáne bilim berý sapasyn arttyrý máselelerin talqylap tájirıbe almasýǵa arnalǵan jahandyq alań.
«QS» konsaltıngtik kompanııasynyń negizin qalaýshysy Nýntsıo Kvakvarellı konferentsııada sóılegen sózinde Qazaqstan eń myqty bilim júıeleri bar elderdiń reıtıngisinde 37-shi oryndy ıelenip, halyqaralyq reıtıngterde jaqsy progreske qol jetkizýde dep atap ótti.
«Sońǵy jyldary ál-Farabı atyndaǵy QazUÝ «QS» halyqaralyq reıtıngisinde qarqyndy ilgerileýdi kórsetip keledi. Ýnıversıtettiń osy baǵyttaǵy tabysty tájirıbesin álemniń joǵary oqý oryndary ózderine engizýde, bul biregeı jáne ózekti bolyp tabylady», - dep atap ótti «QS» aımaqtyq menedjeri Zoıa Zaıtseva.
«QS»-tiń álemdik forýmyn ótkizý alaýyn resmı tabystaý rásiminde QazUÝ rektory akademık Ǵalym Mutanov ishki resýrstardyń tıimdiligin arttyrý jáne ınnovatsııalyq menedjment negizinde álemdik deńgeıdegi ýnıversıtetti qurý tájirıbesimen bólisti, sondaı-aq «Ýnıversıtet 4.0» atty joǵary oqý oryndaryn damytýdyń jańa úlgisin usyndy.
2019 jyldyń qyrkúıeginde Almatyda ótkiziletin «Jahandyq bıiktikke jetý joldary: adamzat murasy men ozyq tehnologııalardyń úılesimi» atty «QS»-tiń aldaǵy úshinshi forýmy ǵylymı-tehnıkalyq jáne rýhanı-adamgershilik uǵymdardyń birligi negizinde jahandyq azamattardy qalyptastyrý máselelerine arnalady. Osyndaı aýqymdy is-sharany ótkizý Qazaqstannyń joǵary bilim júıesiniń halyqaralyq arenadaǵy bedelin aıǵaqtaıdy.
