Qazaqstandaǵy ultaralyq kelisimdi keńinen tanytsam deımin - koreıalyq doktorant

NUR-SULTAN. QazAqparat - Monoultty memleketterge Qazaqstandaǵy ultaralyq kelisimdi keńinen tanytýdy maqsat tutyp otyrmyn. Bul týraly Qazaqstan halqy Assambleıasynyń XXVII sessııasynda Ońtústik Koreıadan Qazaqstanǵa kelip, bilim alyp jatqan Chý Iong-Mın málim etti, dep habarlaıdy QazAqparat tilshisi.

Aıta keteıik, Chý Iong-Mın 1987 jyly Koreıa Respýblıkasynda dúnıege kelgen. L.N. Gýmılev atyndaǵy EUÝ doktoranty.

«Qazaqstanda oqyp jatqanyma úsh boldy. Koreıada 97 paıyz kárister turady. Al Qazaqstanǵa alǵash kelgende, memlekettiń kóp etnosty quramy maǵan qatty áser etti. Álemniń birqatar shet elderinen bilim aldym, biraq olardyń ishinen halyqtyń birligi myqty Qazaqstandy tańdadym. Meni osy jerdegi tatýlyq, teńdik, aýyzbirshilik tańǵaldyrady. Qazaqstan káristeri osy eldiń shynaıy patrıottary, belsendi qoǵam múshesi ekendigine kózim jetti. Jergilikti káristerdiń arasynan 60-tan astam ǵylym doktory, 400 ǵylym kandıdaty shyqqany meni qatty qýantty», - dedi qazaq tilin erkin meńgergen Ońtústik Koreıadan kelgen jas ǵalym.

Osy oraıda Chý Iong-Mın Qazaqstannyń kóp ultty qoǵamy jáne Qazaqstan halqy Assambleıasy taqyrybyn zerttep júrgenin atap ótti.

«Maqsatym - Koreıa sııaqty monoultty memleketterge Qazaqstandaǵy ultaralyq kelisimdi keńinen tanytý», - dedi ol.

Chý Iong-Mın Seýilde qazaq tilin úırenip, Qazaqstanda jetildirgenin aıtty. Koreıada Qazaqstandy tanytý sharalary ótip turady. Uly Dalanyń tabıǵatyn, týrıstik tartymdylyǵyn tanytatyn habarlar, qazaqtyń salt-dástúrleri kórsetilip keledi.

«Negizi, qazaqtar men káristerdiń túrleri óte uqsas. Maǵan kóshede kóp jaǵdaıda qazaqsha sóıleıdi. Dostarym meni Baıan dep ataıdy. Olar menen keıde «Qozy Kórpeshiń qaıda?» dep ázildep suraıdy. Men olarǵa : «Qozy meni izdep júrgen shyǵar» dep jaýap beremin. Múmkin Qozyny Qazaqstannan tabarmyn», - dep ázildedi Chý Iong-Mıng.