Qazaqstandaǵy túrmelerdiń 80 paıyzdan astamy eskirgen - Marat Ahmetjanov

NUR-SULTAN. QazAqparat - Elimizdegi qylmystyq atqarý mekemeleriniń 80 paıyzdan astamy eskirgen. Bul týraly QR Bas prokýrorynyń orynbasary Marat Ahmetjanov qylmystyq atqarý júıesin reformalaýǵa arnalǵan forýmda aıtty, dep habarlaıdy QazAqparat tilshisi.

Marat Ahmetjanov eldegi qylmystyq atqarý júıesindegi reformalar kóbinese zańnamalyq turǵyda júzege asyp jatqanyn atady.Onyń pikirinshe, eldegi qylmystyq zańnama barynsha gýmanızatsııalanyp jatqanymen, sottalǵandardy túrmede ustaý sharttary áli de jaqsartýdy talap etedi.

«2018 jyly qylmystyq atqarý mekemelerinde otyrǵandardyń sany 5000-ǵa azaıǵan bolatyn. Degenmen, eldegi jalpy qylmys sany 7 paıyzǵa ǵana kemigen. Túrmedegi sottalǵandardyń jaǵdaıy minsiz dep aıtýǵa kelmeıdi. Bas prokýratýra men qoǵamdyq uıymdarǵa óte kóp shaǵymdar túsip jatyr. Ásirese qylmystyq atqarý mekemeleriniń qyzmetkerleriniń ruqsat etilmegen tásilmen jumys isteýine shaǵym kóp. Bul jerde qadaǵalaýshy prokýrorlardyń enjarlyǵy bar ekenin de aıtý kerek. Túrme ınfraqurylymynyń 80 paıyzdan astamy eskirip ketkeni jaǵdaıdy odan saıyn ýshyqtyryp otyr», - dedi bas prokýratýra ókili.

Bas prokýrordyń orynbasary eldegi qylmystyq atqarý júıesiniń jumysynda ashyqtyqty qamtamasyz etý kerektigin de atap ótti.

«Qylmystyq atqarý kodeksiniń ózin jetildirý kerek. Qazir ol zań emes, silteme sııaqty. Túrme ákimshiligi men sottalǵandar arasyndaǵy qatynas Іshki ister mınıstrliginiń aktilerimen rettelip otyr. Al túzetý mekemeleriniń basshylaryna óte úlken quzyret berilip qoıǵan» - dedi Marat Ahmetjanov.