Qazaqstandaǵy turǵyn úı qorynyń jalpy aýmaǵy 268 mln. sharshy metrge jýyq

Búgin QR Parlamenti Májilisinde ótken Úkimet saǵatynda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti, dep habarlaıdy QazAqparat.

«Bunyń ishinde 261 mln. sharshy metr nemese jalpy aýmaqtyń 98 paıyzy jekemenshik sektorynyń úlesinde. Sonymen birge elimizdegi kóppáterli úılerdiń jalpy aýmaǵy 157,2 mln. sharshy metrdi quraıdy. Onyń 50,1 mln. sharshy metri nemese 32 paıyzy jóndeýdiń jekelegen túrlerin júrgizýdi talap etedi. Al turǵyn úı qorynyń 3,8 mln. sharshy metri nemese 2 paıyzy turýǵa jaramsyz, buzylýǵa tıisti apatty jaǵdaıdaǵy turǵyn úıler bolyp tabylady», dedi Agenttik tóraǵasy.

Onyń aıtýynsha, kommýnaldyq qyzmetterge tólemderdyń jasalmaýy, ortaq múlikti basqarýda páter menshigi ıeleriniń enjarlyǵy jáne kópqabatty turǵyn úılerdi jóndeýdi qarjylandyrý úshin qarajatty jınaqtaýdyń tıimdi tetiginiń bolmaýy turǵyn úı qoryn ustaýdyń negizgi problemalary bolyp tabylady.