Qazaqstandaǵy tuńǵysh magıstranttar QazUÝ-dyń jalpy jáne etnıkalyq pedagogıka kafedrasynda daıyndalyp shyqqan - professor G.Ahmetova
ALMATY. 8 aqpan. QazAqparat /Ádilet Musahaev/ - Qazaqstandaǵy tuńǵysh magıstranttar QazUÝ-dyń fılosofııa jáne saıasattaný fakýlteti quramyndaǵy jalpy jáne etnıkalyq pedagogıka kafedrasynda daıyndaldy.
Bul jaıynda atalǵan kafedranyń professory, ǵylymı-pedagogıkalyq kadrlar biliktiligin arttyrý respýblıkalyq ınstıtýtynyń dırektory Gúlnaz Ahmetova Almatyda ótken jıynda aıtty.
Ol elimizdegi ýnıversıtetterdiń álemdik reıtıngten oryn alyp, úlken jetistikterge jetýi jolynda kafedranyń qosqan úlesi zor ekendigin aıta kele, munda óziniń dástúrli qalyptasqan damý joly bar ekendigin jetkizdi. «Qazaqstanda pedagogıka salasynda qandaı jańalyqtar bolyp jatsa, onyń barlyǵy aldymen bizdiń kafedrada ashylyp jatady», - deıdi professor.
Al QR pedagogıka ǵylymdary akademııasynyń prezıdenti, pedagogıka ǵylymdarynyń doktory, professor Asqarbek Qusaıynov Elbasy bıylǵy halyqqa Joldaýynda elimizdiń osy aralyqta jetken jetistikterin baıandaı kele, aldaǵy ýaqytta bilim salasyna basa nazar aýdarý kerektigin aıtyp, aldymyzǵa úlken mindetter qoıǵandyǵyn jetkizdi. «Mine búgin 70 jyldyǵyn atap ótip otyrǵan bul kafedra alǵa qoıǵan mindetterge úlken úles qosatyny sózsiz. Ýnıversıtetter qandaı jetistikke jetti degen kezde, aldymen ondaǵy kafedralardyń jetistigine kóńil bólýimiz kerek. Eldegi ozat oqytýshylardyń basym bóligi QazUÝ-dan shyǵýynyń ózi, atalǵan kafedranyń jetken jetistigi dep bilemin», - deıdi professor.
