Qazaqstandaǵy terrorıstik áreketter kezinde órt sóndirýshi kólikterge 33 ret shabýyl jasalǵan

NUR-SULTAN. QazAqparat – Qazaqstanda terrorıstik áreketter kezinde órt sóndirýge barǵan kólikterge 33 ret shabýyl jasalǵan, dep habarlaıdy QazAqparat QR Tótenshe jaǵdaılar mınıstrliginiń málimetterine silteme jasap.

«Elimizdiń keıbir aımaqtarynda bolǵan zańsyz áreketter kezinde jalpyadamzattyq jáne moraldyq qundylyqtar aıaqqa taptalyp, adamdar men olardyń múlikterin órtten saqtandyrýǵa barǵan qarýsyz órt sóndirýshilerge shabýyl jasaldy. Búkil álemde, tipti áskerı qaqtyǵystar kezinde de qutqarýshylar eki taraptyń da qoldaýymen óz mindetterin júzege asyryp kelgen bolatyn»,-delingen habarlamada.

Sondaı-aq ondaǵy málimetterge qaraǵanda, órtti sóndirýge barǵan órt sóndirýshi kólikterge 33 ret shabýyl jasaldy. Tártipsizdikter kezinde órt sóndirýshilerge tas laqtyryp, oq atqan jáne olardyń qozǵalysyna kedergi keltirgen. Óziniń qyzmettik mindetin atqarý kezinde Tótenshe jaǵdaılar mınıstrliginiń 10 qyzmetkeri jaraqat alǵan, keıbiri atys qarýynan.

Osy shabýyldardyń saldarynan 29 órt sóndirýshi jáne qutqarý tehnıkasyna zaqym keldi, sondaı-aq 5 avtotsısterna tolyǵymen janyp ketken.

Qaýip-qaterge qaramastan Tótenshe jaǵdaılar mınıstrliginiń ókilderi 75 ret órt sóndirip, qaýipti aımaqtan 143 azamat qutqarylǵan.

Elimizdiń barlyq aımaǵynda tótenshe jaǵdaılar qyzmeti úzdiksiz jumys istedi.