Qazaqstandaǵy telemedıtsına kúnnen kúnge damyp keledi - DDU

ASTANA. QazAqparat - Dúnıejúzilik densaýlyq saqtaý uıymynyń (DDU) resmı saıtynda Qazaqstandaǵy telemedıtsına týraly maqala jarııalandy. Onda Qazaqstannyń aýyldy jerlerde turatyn halyqqa medıtsınalyq qyzmet kórsetý úshin jańa tehnologııalarǵa ınvestıtsııany kóptep salyp jatqany aıtylǵan jáne telemedıtsına jetistikterine toqtalǵan.

«Qazaqstannyń telemedıtsına júıesi 2004 jyly qurylǵan. Ol aýyl turǵyndaryna arnaıy medıtsınalyq kómek alýǵa múmkindik beredi. Densaýlyq saqtaý mınıstrliginiń 2017-2021 jyldarǵa arnalǵan strategııalyq josparynda da telemedıtsınaǵa erekshe nazar aýdarylǵan. Qazaqstan tsıfrlyq densaýlyq salasyn damytýǵa kúsh salyp jatyr», dep jazady DDU saıty.

Avtor Qazaqstanda 2016 jyly 28 myń telemedıtsınalyq qyzmet pen vıdeokonsýltatsııa ótkizilgenin aıtady.

«Qazaqstannyń telemedıtsına júıesi aýdandyq, oblystyq, ulttyq deńgeıdegi 209 medıtsına mekemesinde jumys isteıdi. Sonymen qatar júıe sanıtarlyq avıatsııany da qamtıdy. Bul júıe tek medıtsınalyq qyzmet kórsetý ǵana emes, medıtsınalyq oqý oryndary stýdentterine dáris oqyp, semınarlar ótkizý úshin de qoldanylady», deıdi avtor.