Qazaqstandaǵy tehnoparkter «Sılıkon jazyǵymen» yntymaqtastyq ornatýy kerek - D. Nazarbaeva

ASTANA. QazAqparat - Qazaqstanda tehnopark ýnıversıtetteri AQSh-taǵy «Sılıkon jazyǵymen» tyǵyz yntymaqtastyq ornatýy kerek. Búgin Májilistiń Áleýmettik-mádenı damý komıtetiniń keńeıtilgen otyrysynda komıtet tóraıymy Darıǵa Nazarbaeva osylaı málim etti. Jıyn barysynda Qazaqstandaǵy tehnoparkterdi damytý máseleleri talqylanǵan bolatyn.

Jıyn barysynda komıtet tóraıymy tehnopark ýnıversıtetteri Qazaqstannyń Ultttyq kásipkerler palatasymen tyǵyz baılanysta bolýy tıistigin atap ótti. «Shyndyǵynda, tehnoparkterdi ýnıversıtettermen «qosaqtaý» kerek. Stýdentterdiń ǵylymǵa barýyna, eksperımentter, synaqtar jasap, tájirıbe jınaqtaýyna jaǵdaı jasaýǵa tıispiz. Bul elimiz úshin ásirese, ǵylymı kadr daıarlaý salasyndaǵy birneshe máseleni sheship berer edi», - deıdi Darıǵa Nazarbaeva. Bul rette depýtat bıznes pen tehnoparkter arasyndaǵy baılanystan biraz máseleni sheshýge bolatynyn atap ótti.

«Taǵy bir mańyzdy másele ulttyq tehnoparkterdi nege halyqaralyq venchýrlyq qorlarmen baılanystyrmasqa. Máselen, «Sılıkon jazyǵymen» nege yntymaqtastyqty damyta almaımyz? Shyndyǵynda, «Sılıkon jazyǵynyń» mamandary elimizge kelip turady emes pe?» - dedi D.Nazarbaeva. Sóz arasynda depýtat elimizde qoldaý tappaǵan kóptegen qazaqstandyq ónertapqyshtar shetelge júginip jatqanyn da tilge tıek etti.

Esterińizge sala keteıik, AQSh-tyń Kalıfornııa shtatynda dúnıe júzindegi joǵary tehnologııalar men kompıýterler jasaýdyń eń iri jáne eń tabysty ortalyqtarynyń biri - áıgili «Sılıkon jazyǵy» ornalasqan. Munda kompıýterler men olardy baǵdarlamalyq jaǵynan qamtamasyz etý quraldaryn shyǵaratyn jetekshi kásiporyndardyń shtab-páterleri, zertteý ortalyqtary da jumys jasaıdy. Al depýtat D. Nazarbaeva óz sózinde dál osy ortalyqpen yntymaqtastyq týraly aıtyp otyr.