Qazaqstandaǵy tarıhı eskertkishterdi saqtaýǵa jylyna 700 mln. teńge bólinedi

ASTANA. QazAqparat - Qazaqstandaǵy tarıhı mádenı eskertkishterdi saqtaýǵa, olardy qaıta qalpyna keltirip, jóndeýge jylyna 700 mln. teńge bólinedi. Bul týraly QazAqparattyń resmı saýalyna QR Mádenıet jáne sport mınıstrliginiń Mádenıet jáne óner komıteti málim etti.

Vedomstvonyń habarlaýynsha, «Mádenı mura» memlekettik baǵdarlamasy aıasynda elimizdegi tarıhı jádegerlerdi túgendeý boıynsha aýqymdy sharalar júrgizilgen. Respýblıkalyq jáne jergilikti mańyzdaǵy mádenı muralardyń tizimi jasalǵan. Qazirgi ýaqytta elimizde 218 respýblıkalyq mańyzdaǵy jáne 11 277 jergilikti mańyzdaǵy jádigerler bar. «Qazaqstannyń alty oblysy (Almaty, Qyzylorda, Soltústik Qazaqstan, Aqmola, Pavlodar, Aqtóbe) jáne Almaty qalasy boıynsha 7 entsıklopedııalyq anyqtamalyqtar ázirlenip, baspadan shyǵaryldy», delingen habarlamada.