Qazaqstandaǵy sýpermarketter «Qazaqstanda jasalǵan» aktsııasyn jalǵastyryp jatyr

ASTANA. QazAqparat - Qazaqstandaǵy sýpermarketter «Qazaqstanda jasalǵan» aktsııasyn burynǵysynsha jalǵastyryp jatyr. Bul týraly búgin Ortalyq kommýnıkatsııalar qyzmetindegi baspasóz máslıhatynda «Qazaqstan-2050» jalpyulttyq qozǵalysy keńesiniń tóraǵasy Danat Jumın málim etti.

Jalpyulttyq qozǵalys «Qazaqstanda jasalǵan» aktsııasyn qoldaǵan alǵyshqy uıymdardyń biri ekenine toqtalǵan D. Jumın, uıym belsendileri sýpermarketter men jergilikti bılikpen baılanysqa túsip, atalǵan aktsııany el boıynsha bastaǵanyn eske salyp ótti.

«Osy baǵytta otandyq ónimdi satyp alýdyń mańyzdylyǵy túsindirildi. Bul turǵyda biz jaqynda (13-30 sáýir aralyǵynda) monıtorıng júrgizdik. Aktsııa ótip jatqanyna úsh aı ótti jáne osy merzimde qandaı nátıjeler bar ekenin zerdeledik. Bizdiń belsendiler 222 cýpermarketti aralady, ıaǵnı bular iri bólshek saýda nysandarynyń 60 paıyzyn quraıdy. Monıtorıng nátıjesi boıynsha sýpermarketterdiń 86 paıyzǵa jýyǵy osy aktsııany burynǵysynsha jalǵastyryp jatqandyǵy belgili boldy»,- dedi ol.

Sonymen qatar D. Jumın sýpermarketter áli de bolsyn halyqty otandyq taýarlarǵa nazaryn aýdarý isine nemquraıly qaraýy basymdaý ekenin jetkizdi. Budan bólek, sýpermarketterdiń jartysyna jaýyǵynda qatardaǵy qyzmetkerler «Qazaqstandaǵy jasalǵan» jarnamasynyń mańyzyn túsindire almaǵan kórinedi.