Qazaqstandaǵy sý sportynyń bolashaǵy zor – Reseı chempıony Sofıa Spodarenko
Sofıa Spodarenko Óskemende dúnıege kelgen. Úsh jasynda ata-anasymen elden kóship ketken. Ájesi, týǵan-týystary osy jaqta qalǵandyqtan balalyq shaǵynda týǵan qalasyna jıi keletin. Keıin óse kele elge sapary sıredi, bos ýaqytynyń bári jattyǵýmen jáne jarystarmen ótetin. Qazir Qazaqstanǵa kóship kelgenine ásirese ájesi qatty qýanypty, endi olar jıi kórisetin bolǵan.
- Kishkentaı bolǵanda eki el arasyndaǵy aıyrmashylyqty baıqamaıtynmyn. Qazir meniń dırekte dostaryma jıi jiberetin habarlamalarymnyń biri – «Qazaqstan 3023 jylda ómir súrip jatqandaı, jyldam damyp keledi».
- Sporttaǵy áriptesterińiz Sizdi qalaı qarsy aldy?
- Men úshin bul qıyn suraq der edim. Árıne, qobaljý boldy, meniń aýysyp kelýimdi bireýler básekelestik retinde qabyldaıtynyn túsindim. Biraq mende bireýdiń medalin tartyp alar oı da, maqsat ta joq. Sondyqtan mundaǵy áriptesterim jyly qabyldaǵanda tań qalǵanym ras. Keıin qazaqstandyqtar shynaıy jáne ózgeshe dos bola alatynyna kóz jetkizdim. Ony men óz otbasymnan da baıqaıtynmyn.
- Qazaqstannyń atynan óner kórsetýge sheshim qabyldaý qıyn bolǵan shyǵar?
- Árıne úırenshikti, jaıly ortadan ketkiń kelmeıdi ǵoı. Sheshimdi qabyldaý ońaı bolǵan joq. Meniń ómirim kúndelikti turmystan bastap, sporttyq daıyndyqqa deıin tutas ózgerdi. Biraq meniń aldyma qoıǵan maqsatym bar, sol úshin azamattyǵymdy da, eldi de ózgertip otyrmyn. Reseıde tursam, halyqaralyq jarystarǵa qatysa almas edim.
- Josparyńyz jáne maqsatyńyz aıqyn, oqyrmandarymyzǵa aıtyp ótińizshi. Instagramdaǵy jeke paraqshańyzda «ol – erekshe» dep atap óttińiz...
- Ár sportshy joǵary kórsetkishke umtylady. Meniń qazirgi maqsatym – Parıjde 2024 jyly ótetin Olımpıadaǵa qatysý. Sportpen kásibı túrde aınalysyp, olımpıada júldegeri bolýdy armandamaý aqymaqtyq bolar edi. Shynyn aıtqanda, Qazaqstanda Reseıge qaraǵanda básekelestik tómen. Onda chempıonatta 800-1000 adam qatysady, Qazaqstanda sportshylardyń sany 300-den aspaıdy.
Qurama qataryndaǵy jattyǵýlarǵa degen kózqaras óte unaıdy. Meniń oıymsha, bul bolashaqta Qazaqstandaǵy sý sportynyń damýyna zor áser etedi. Úlgi alatyn sportshy - olımpıadanyń altyn medal ıegeri Dmıtrıı Balandın de bar. Qazaqstanǵa sý sportyn, sonyń ishinde júzýdi barynsha damytý kerek dep oılaımyn.
- Jattyǵý barysynda qandaı qıyndyqtarǵa keziktińiz?
- Qıyn boldy dep aıta almaımyn. Qolaısyzdyq bolǵany ras, óıtkeni, el, komanda, aımaq – bári ózgerdi. Men – ózim týǵan Shyǵys Qazaqstan emes, Túrkistan oblysynyń namysyn qorǵaımyn. Barlyǵy da maǵan tańsyq, jattyqtyrýshymdy kúnde suraqtyń astyna alamyn. Júzýden Ulttyq quramada menimen Stanıslav Osınskıı jumys isteıdi. Al Túrkistandaǵy jattyqtyrýshym - Janas Shaldarbekov.
- Al heıterlermen qalaı kúresip jatyrsyz?
- Aýysý barysynda synshyldardyń shabýylyn basymnan ótkerýge týra keldi. Desek te, kópshilik meni qoldady. Qazaqstandyqtardan, sonyń ishinde tanymaıtyn adamdardan kóptegen qoldaýdy kórdim. Týǵan-týystarym men dostarym demeý boldy. Bul óte mańyzdy. Agressıvti, jaqtyrmaǵan jazbalardy oqymaýǵa tyrystym (kúledi). Shynymdy aıtsam, men mundaı jaǵdaıǵa daıyn boldym. Bastapqy tórt kún qıyn ótti. Keıin jattyǵýlar bastalyp, meniń bar oıymdy osy protsess aldy.
- Qazaqstanmen Sizdi tek sport qana baılanystyra ma?
- Maǵan el de, adamdary da unaıdy. Ýaqytymnyń kóp bóligi Almatyda ótip jatyr. Megapolısterdi unata qoımasam da, bul qala óte jaıly. Ómirimniń bir bóligin osy shaharda ótkizgim keletinin túsindim. Men kosmopolıtpin. Boıymda ýkraındyqtardyń qany bar – meniń atam kezinde Qazaqstanǵa qonys aýdarǵan eken. Ómirimniń basym bóligin Reseıde ótkizsem de, Qazaqstannyń mádenıetine qanyqpyn. Bolashaqta qaıda turatynymdy, qaı elde demim úziletinin bilmeımin. Biraq ómirimniń bir bóligin Qazaqstanda ótkizgim keledi.
Esterińizge salaıyn, júzýden Reseı chempıony, 25 jastaǵy Sofıa Spodarenko 11 tamyzdan bastan halyqaralyq jarystarda Qazaqstan atynan óner kórsetip júr. https://kaz.inform.kz/news/zhuzuden-resey-chempiony-kazakstan-kuramasyna-auysty_a4100428
