Qazaqstandaǵy sý resýrstarynyń júıesine aýdıt júrgiziledi
NUR-SULTAN. QazAqparat - Jyl sońyna deıin Úkimet sý resýrstarynyń tolyq aýdıtin júrgizý tıis. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti, dep habarlaıdy QazAqparat tilshisi.
«Sýmen qamatamasyz etý men sý tartý máselesi erekshe nazar aýdarýdy qajet etedi. Biz sý resýrstaryna, sý sharýashylyǵy qurylystaryn tolyq kólemde pasporttaýdy eshqashan júrgizbeppiz. Úkimette osyndaı nysandardyń naqty sany men jaǵdaıy boıynsha málimet joq. Jekemenshik sý sharýashylyǵy nysandaryn esepke alý tıisti deńgeıde júrgizilmeýde. Sondyqtan Úkimetke jyl sońyna deıin sý resýrstarynyń jáne sýmen qamtamasyz etýdegi barlyq ınfraqurylymynyń ırrıgatsııa júıesine tolyq aýdıt júrgizýdi tapsyramyn», - dedi Prezıdent.
Memleket basshysynyń aıtýynsha, bul óz kezeginde saladaǵy jaǵdaıdy tolyq baǵalaýǵa jol ashady.
«Onyń negizinde Úkimet pen ákimdikterge atalǵan nysandardy jóndeý men jańǵyrtý, onyń ishinde aınalymǵa jańa sýarmaly egistikterdi engizý boıynsha naqty sharalardy ázirleý mindeti tur», - dedi Q. Toqaev.
