Qazaqstandaǵy sý qoımalarynyń ıelerine biryńǵaı talap bekitilmek
NUR-SULTAN. QazAqparat – Qazaqstandaǵy sý qoımalarynyń ıelerine biryńǵaı talap bekitiledi. Bul týraly Parlament Senatynyń otyrysynda Halyqaralyq qatynastar, qorǵanys jáne qaýipsizdik komıtetiniń múshesi Qaırat Qojamjarov málim etti, dep habarlaıdy QazAqparat tilshisi.
«Qazaqstandaǵy sý qoımalarynyń 40 paıyzy eskirip ketken. Olardyń 82 paıyzynyń paıdalanyla bastaǵanyna 40 jyldan asqan. Tutastaı alǵanda barlyǵy apattyq sý jiberý júıesine muqtaj. Qazirgi tańda sý qoımalarynyń ıeleri ınvestıtsııa salmastan, barlyq paıdany óz qaltalaryna salady. Al tótenshe jaǵdaılarǵa aınalyp kelgende memleket jaýapty bolyp otyr. Qyzylaǵashtaǵy oqıǵa báriniń esinde bolar», - dedi Qaırat Qojamjarov.
Osy sebepti senator sý qoımalarynyń aýqymyna qaramastan, ony kútip ustaýdyń biryńǵaı talabyn bekitý kerek dep esepteıdi.
«Sonymen birge, sý nysandarynyń esebi boıynsha jaýapty organnyń quzyretin bekitken durys. Sebebi, Qazaqstanda sý qoımalarynyń sany, tehnıkalyq jaı-kúıi men qaıda ornalasqany týraly naqty tolyqqandy baza joq. Tıisti zań jobasy qazirgi tańda Senatta qaralýda», - dedi ol.
Eske sala ketsek, buǵan deıin Qaırat Qojamjarov álemde 68 memleket sý defıtsıtin bastan keshirip otyrǵanyn, sonyń ishinde Qazaqstan da baryn atap ótken edi.
