Qazaqstandaǵy sý bógetteriniń qaýipsizdigi týraly zań jobasy ázirlenedi
Sharaǵa Parlament depýtattary, memlekettik organdardyń ókilderi men sarapshylar qatysty.
Parlament Senaty tóraǵasynyń orynbasary Sergeı Gromov tyńdaýdy asha kelip, elimizdiń halqyn sýmen qamtamasyz etý kúrdeli ári ony sheshýdiń tıimdi joldaryn talap etetin mindet ekenin atap ótti. Tóraǵa orynbasary Qazaqstan aýmaǵynyń sýmen qamtamasyz etilýi Eýrazııa qurlyǵyndaǵy elder úshin asa mańyzdy ekenine nazar aýdardy. Prezıdent N. Nazarbaevtyń «Qazaqstan - 2050» Strategııasy: qalyptasqan memlekettiń jańa saıası baǵyty» Joldaýynda sý resýrstaryna zárýlik HHІ ǵasyrdaǵy jahandyq on qaterdiń qatarynda atap ótilgen bolatyn.
S. Gromov sý sharýashylyǵy qyzmetin zańnamalyq turǵyda qamtamasyz etý jóninde Parlament júıeli jumystar atqaryp kele jatqanyn eske saldy. Atap aıtqanda, ekologııalyq qaýipsiz, ári sýdy paıdalanýdyń ońtaıly ekonomıkalyq deńgeıine qol jetkizý men ony qoldaý jáne sý qoryn qorǵaýǵa baǵyttalǵan sý zańnamasy júıeli túrde jetildirilip keledi. Senat tóraǵasynyń orynbasary talqylanyp otyrǵan másele áleýmettik-ekonomıkalyq jáne saıası erekshe mánge ıe, ári halyqtyń ál-aýqatynyń mańyzdy kórsetkishteriniń biri dep túıindedi sózin.
Aýyl sharýashylyǵy mınıstriniń orynbasary Erlan Nysanbaev Sý kodeksiniń negizgi erejelerin iske asyrý, sýdy paıdalaný júıesin jetildirý jáne sý resýrstaryn qorǵaý máseleleri týraly depýtattardy habardar etti. Baıandamashy sý salasyna qatysty qurylystardyń qaýipsizdigine egjeı-tegjeıli toqtalyp, 2018 jyly bógetterdiń qaýipsizdigi týraly zań jobasyn ázirleý kózdelip otyrǵanyn atap ótti.
E. Nysanbaev sýdy paıdalaný jáne shekaraaralyq ózenderdi qorǵaý máselelerin retteý týraly da aıtty. Mınıstr orynbasarynyń aıtýynsha, búgingi tańda shekaraaralyq ózenderdiń sýyn bólisý jónindegi QHR-dan basqa irgeles memlekettermen ýaǵdalastyqtar bar. Bul olqylyqty túzetý úshin Qazaqstan men Qytaı arasynda ekijaqty Kelisim ázirleıtin arnaıy jumys toby quryldy. Aımaqtaǵy sý resýrstaryn paıdalaný máselelerin retteý úshin Ortalyq Azııa elderimen jumystar júrgizilip jatyr.
Dóńgelek ústel barysynda aýyl sharýashylyǵy mınıstrligi sý resýrstary jónindegi komıtetiniń tóraǵasy Islam Ábishev, ınvestıtsııalar jáne damý mınıstrligi qurylys jáne turǵyn úı-kommýnaldyq sharýashylyq jónindegi komıtetiniń tóraǵasy Marhabat Jaıymbetov, «Qazaqstan sý arnasy» sýmen qamtamasyz etý jáne sý burý kásiporyndary assotsıatsııasynyń prezıdenti Valerıı Sıýndıýkov, «Geografııa ınstıtýty» JShS dırektory Ahmetkal Medeý, Halyqaralyq «Araldy qutqarý qory» dırektorynyń orynbasary Ámirhan Kenshımov, Ortalyq Azııadaǵy memleketaralyq sý sharýashylyǵy úılestirý komıssııasynyń ǵylymı-aqparattyq ortalyǵy bólimshesiniń dırektory Narıman Qypshaqbaev sóz sóıledi.
Senatorlar Darıǵa Nazarbaeva men Qýanysh Aıtahanov talqylanyp otyrǵan máseleler boıynsha óz oılaryn ortaǵa saldy.
Talqylaýdy qorytyndylaı kelip, Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Sergeı Plotnıkov otyrysta paıdaly ári nátıjeli áńgime óristegenin aıtty. Shekaraaralyq ózenderdegi sýdy paıdalaný jáne ony retteýge baılanysty birqatar ózekti máseleler talqylandy. Pikirsaıys barysynda aıtylǵan usynystar tıisti memlekettik organdarǵa jiberiletin usynymdarǵa qosylady jáne Parlamenttiń zań shyǵarý jumystary barysynda paıdalanylady.