Qazaqstandaǵy sý aıdyndaryna 60 mln shabaq jiberiledi

ASTANA. QazAqparat - Qazaqstanda respýblıkalyq mártebesi bar sý aıdyndaryna qundy balyq túrleriniń 60 mln shabaǵy jiberiledi. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet aıtty, dep habarlaıdy QazAqparat tilshisi.

«Balyq resýrstarynyń ósimin molaıtý jónindegi 2018 jylǵa arnalǵan memlekettik tapsyrys sheńberinde Almaty, Qyzylorda jáne Soltústik Qazaqstan oblystarynyń sý aıdyndaryna tuqy jáne ósimdikjemdi balyqtardyń (aq amýr, dóńmańdaı) shabaqtaryn jiberý jumystary bastaldy. 2018 jylǵy 17-20 qyrkúıek aralyǵynda «Petropavl balyq pıtomnıgi» RMQK Petropavl jáne Sergeev sý qoımalaryna 731 250 dana birjazǵy tuqy shabaǵyn jiberdi», - dep jazdy Sáken Dildahmet Feısbýktegi paraqshasynda.

Habarlanyp otyrǵandaı, 20 qyrkúıekten bastap «Qamystybas balyq pıtomnıgi» RMQK men «Qapshaǵaı ýyldyryq shashý-ósirý sharýashylyǵy - 1973» JShS Qyzylorda jáne Almaty oblysynyń sý aıdyndaryna balyq jiberý jumystaryn bastap ketken.

«Balyqtardy sý aıdyndaryna jiberý jumystaryn qabyldaý jergilikti atqarýshy organdardyń, oblystyq orman sharýashylyǵy jáne janýarlar dúnıesi aýmaqtyq ınspektsııalarynyń jáne ǵylymı uıymdardyń ókilderinen quralǵan komıssııa arqyly júzege asyrylýda. Memlekettik tapsyrys sheńberinde 2018 jyly respýblıkanyń sý aıdyndaryna 60 mln dana shamasynda qundy balyq túrleriniń shabaqtaryn jiberý josparlanǵan», - delingen habarlamada.