Qazaqstandaǵy statsıonarlarda qosymsha 10 myń tósek-oryn daıarlanady

NUR-SULTAN. QazAqparat – Osy jyldyń tamyz aıynyń sońyna deıin elimizdegi statsıonarlarda qosymsha 10 myń tósek-oryn daıarlanady. Bul týraly OKQ-da ótken baspasóz máslıhatynda Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Bul vırýstyń bir ereksheligi – patsıentter kóbine statsıonarlyq em-domǵa jáne tynys alýdy jasandy túrde qoldaýǵa muqtaj. Qazirgi tańda eldegi statsıonarlyq tósek-oryndardyń tolymdylyǵy - 60 paıyz. Nur-Sultan men Almaty qalalarynda bul kórsetkish – 90 paıyz. COVID-19 patsıentterin emdeý úshin 348 medıtsınalyq uıymda 26 myń tósek-oryn ázirlendi», - dedi Alekseı Tsoı.

Mınıstrdiń habarlaýynsha, tamyz aıynyń sońyna deıin statsıonarlarda 10 myń tósek-oryn daıarlanady. Ol statsıonarlardyń qurylymynda jan saqtaý bólimsheleri men ıntensıvti terapııa palatalary ashylyp, ókpeni jasandy jeldetý apparattary qoıylady.

«Ókpeni jasandy jeldetý apparattarynyń jalpy sany – 3 294. Keıingi aıda 978 apparat satyp alyndy. Oǵan qosymsha osy apparattyń 1 myńyn satyp alý kózdelýde», - dedi ol.

Eske sala ketsek, Úkimet 2 kúnniń ishinde osy jyldyń naýryz-mamyr aıyndaǵydaı qatań karantın sharalaryn engizý boıynsha usynys ázirleýi tıis.

Bul tapsyrmany koronavırýs indetiniń taralýyna qarsy sharalar qabyldaý jónindegi keńes barysynda QR Prezıdenti Qasym-Jomart Toqaev bergen edi .

Óz tarapynan Densaýlyq saqtaý mınıstri qatań karantın boıynsha túpkilikti sheshim jaqynda qabyldanatynyn habarlaǵan bolatyn.