Qazaqstandaǵy sporttyq qozǵalys álemdik keńistikte tanymal - Arystanbek Muhamedıuly
ASTANA. QazAqparat - Astana marafonynyń álemdik aýqymda tanymaldyǵy artyp keledi. Bul týraly búgin elordada qaıyrymdylyq maqsattaǵy iri halyqaralyq Astana marafonynda Mádenıet jáne sport mınıstri Arystanbek Muhamedıuly málim etti.
«Keshe ózim kýáger boldym, ıaǵnı kóptegen sheteldikter Astana marafonyna qatysý úshin elimizge kelip jatty. Bul óz kezeginde osy halyqaralyq marafonnyń álemdik aýqymda tanymaldyǵy artqanynyń dáleli. Sonymen qatar osy rette Qazaqstandaǵy sporttyq qozǵalys álemdik keńistikte kórinip otyrǵanyn senimmen aıtýǵa bolady. Sondyqtan bundaı mańyzdy sharalarǵa elimizge keletin meımandar sany artyp keledi. Jyl ótken saıyn «Astana Marafonynyń» tanymaldyǵy óse túsetindigine senimdimin»,-dep toqtaldy mınıstr.
Budan buryn habarlanǵandaı, elordadaǵy qaıyrymdylyq maqsattaǵy iri halyqaralyq Astana marafonynda QR Premer-Mınıstri Kárim Másimov 21,1 shaqyrym qashyqtyqty baǵyndyrdy. Sonymen qatar bul qashyqtyqta marafonnyń máre syzyǵynan QR Mádenıet jáne sport mınıstri Arystanbek Muhamedıuly men Aqparat jáne kommýnıkatsııalar mınıstri Dáýren Abaev ta ótti.
Máre syzyǵanan ótkennen keıin K. Másimov pen sharaǵa qatysqan birqatar mınıstrler jáne Rıo Olımpıadasynyń jeńimpazdary men júldegerleri estelik fotosýretke tústi.
A. Muhamedıulynyń sózine qaraǵanda, Premer-Mınıstr Kárim Másimov kúndelikti tańǵy saǵat 6-da turyp, júgirýge shyǵady.
«Biz sońǵy eki aıda Qazaqstannyń óńirlerin aralaǵan kezde Úkimet basshysy kúnde tańerteń júgirýge shyǵyp júrdi. Men óz basym keshke qaraı júgiremin. Jalpy, búgingi júgirip ótken 21,1 shaqyrymdy jaqsy qashyqtyq dep esepteımin»,-dedi mınıstr.
