Qazaqstandaǵy sport kúni: 18 tamyzda elordada qandaı sharalar ótedi
ASTANA. QazAqparat - Aldaǵy demalys kúnderi elimizde Sport kúni atalyp ótiledi. Qazaqstan Respýblıkasy Prezıdentiniń Jarlyǵyna sáıkes, dene shynyqtyrý qyzmetkerleriniń kásibı merekesi tamyz aıynyń árbir úshinshi jeksenbisinde toılanady. Astanada merekelik sharalar barlyq sport mekemelerinde uıymdastyrylady, dep habarlaıdy elorda ákimdiginiń resmı saıty.
16-19 tamyz aralyǵynda Qazaqstandaǵy sport kúnine oraı elordamyzdyń barlyq sport alańdarynda birýaqytta 19 sport túrinen jarystar ótkiziledi. Baǵdarlamaǵa qazaq kúresi, gir kóterý, armrestlıng, asyq atý, búrkitshiler jarysy, kókpar, toǵyzkumalaq, grepplıng, shańǵyroller, tennıs, velojarys, jeńil atletıka, paýerlıftıng, akademııalyq esý, boks, kıokýshınkaı-kan karate, taekvondo, qoıan-qoltyq urys, shaıbaly hokkeı engizildi.
Osy kúnderi sport saraılary, keshenderi jáne qalalyq sport klýbtarynda ótetin jarystarǵa 3 myńǵa jýyq sportshy qatysady. Astana qalasynyń mádenıet jáne sport basqarmasy salamatty jáne belsendi ómir saltyn ustanatyn áýesqoılar men kásipqoılardy, qala turǵyndary men qonaqtaryn josparlanǵan sharalarǵa qatysýǵa shaqyrady.
Astanada Sport kúni qurmetine ótkiziletin aýqymdy sharalardyń biri - velojarys. Atalǵan shara elordada jyl saıyn jazdyń sońynda uıymdastyrylady, oǵan myńǵa jýyq adam qatysady. Jarys barysynda sportshylar Qabanbaı batyr dańǵylynyń boıymen «Saltanat saraıynan» «Astana Arena» stadıonyna deıin 5 shaqyrymdy júrip ótedi. Tirkeý saǵat 7:00, jarys - 08.00-de bastalady.
Sport kúnine oraılastyrylǵan buqaralyq velosherýdiń syzbasy
NAZAR AÝDARYŃYZDAR!
Áýesqoılar týrnırine qatysýshylardyń óz velosıpedteri bolýy tıis.
Aıta keteıik, velojarys kezinde 18 tamyzda saǵat 07:45-ten 08:45-ke deıin velojarys marshrýty boıynsha kólik qozǵalysy jartylaı (Qabanbaı batyr dańǵylynda) shekteledi. Osyny eskere otyryp, júrgizýshilerden óz qozǵalys baǵyttaryn aldyn ala josparlaýy tıis.
