Qazaqstandaǵy sheteldik kompanııalar sany 11,8 paıyzǵa ósti

NUR-SULTAN. QazAqparat - Kúzdiń basynda Qazaqstanda sheteldik úlestiń qatysy bar jumys istep turǵan kompanııalar sany 21,7 myńǵa jetti. Bul ótken jyldyń dál osyndaı kórsetkishinen 11,8 paıyzǵa kóp, dep habarlaıdy QazAqparat tilshisi.

Ranking.kz málimetinshe, onyń 97,3 paıyzy nemese 21,1 myńy - shaǵyn, 1,5 paıyzy (325) - orta jáne 1,2 paıyzy (260) - iri kompanııa sanalady. Sheteldik kompanııalardyń 8,6 myńy kóterme jáne bólshek saýda salasynda jumys isteıdi. Qurylys salasynda 2,2 myń, kásibı, ǵylymı jáne tehnıkalyq qyzmet salasynda 1,6 myń kompanııa bar.

Qazaqstandaǵy sheteldik kompanııalardyń eń kóbi - reseılik. Aıtalyq, osy jyldyń tamyz aıyn sońynda Qazaqstanda Reseıdiń 7 040 kompanııasy jumys istep turdy. Olardyń basym bóligi (3 061 kompanııa) saýda salasynda qyzmet kórsetedi.

Elimizde Túrkııadan kelgen kásiporyndar da az emes. Onyń sany - 2 044. Túrik kompanııalary negizinen saýda, qurylys, óńdeý ónerkásibi salalarynda qyzmet kórsetedi. Aıta keterligi, qonaq úı men tamaqtaný boıynsha qyzmet kórsetý salasynda túrik kompanııalarynyń sany (172 kásiporyn) basym.

Qazaqstanda tirkelgen sheteldik kompanııasy bar eldiń qatarynda Qytaı da bar. Bul elden 1 020 shaǵyn, 16 orta jáne 20 iri kompanııa jumys isteıdi.