Qazaqstandaǵy shaǵyn kemeler qaýipsizdik turǵysynan tekseriledi
NUR-SULTAN. QazAqparat - QR Indýstrııa jáne ınfraqurylymdyq damý mınıstrliginiń Kólik komıteti 1 maýsymnan 31 tamyzǵa deıin jyl saıyn jalpyrespýblıkalyq «Skýter» aktsııasyn ótkizedi, dep habarlaıdy QazAqparat.
Sharanyń maqsaty - shaǵyn ólshemdi kemelerdi qaýipsiz paıdalanýdy qamtamasyz etý, eldiń sý aıdyndarynda apattyq jaǵdaılar men ekologııalyq qaterdi boldyrmaý, jazataıym oqıǵalar men adamdardyń ólim-jitimin azaıtý.
«Qazaqstanda katamaran, salmaqty jáne úrlemeli qaıyqtardy qospaǵanda, 18 myńnan astam shaǵyn ólshemdi keme tirkelgen. Shomylý maýsymy kezinde jasandy jáne tabıǵı sý aıdyndarynda adamdar men kemeler sany artady. Osylaısha, adamdardyń qaza tabýy, densaýlyǵyna zııan keltirý sekildi oqys oqıǵalardyń táýekeli artady. Aktsııa kezinde shaǵyn kólemdi kemelerdi qaýipsizdik talaptaryn saqtaý turǵysynan tekseriledi. Olarda qutqarý quraldarynyń bolýy, basqarý quqyǵy bar tulǵalardyń kemelerdi basqarýy, olardyń mindetti túrde tirkelý sekildi talaptar tekseriledi», delingen habarlamada.
Kólik komıtetiniń aýmaqtyq organdary keme ıelerimen, shaǵyn kólemdi kemelerdiń turaqtaý bazalarynyń jáne demalys aımaqtarynyń ıelerimen shaǵyn kólemdi flotty qaýipsiz paıdalanýdy retteıtin zańnama talaptaryn túsindiredi.
Sonymen qatar Kólik komıteti demalys kezinde sý qoımalarynda qaýipsizdik erejelerin saqtaý kerektigin eskertedi.
Sonymen qatar, kópshilik demalatyn oryndarda tyıym salynatyn áreketter de kórsetilgen. Balany eresektiń qaraýynsyz shomylýǵa jibermeý; motorly, eskekti qaıyqtarǵa jáne basqa da júzý quraldarynda qaraı júzýge; beıimdelmegen qurylystardan sýǵa sekirýge; mas kúıde shomylýǵa, júzý taqtasynda, bórenelerde, jatyp júzetin qurylǵylarda, avtomobıl kameralarynda, úrlengen matratstarda júzýge; eskertý jáne tyıym salý belgileri men jazýlary bar qalqandar qoıylǵan oryndarda shomylýǵa; shaǵyn kólemdi kemelerde qutqarý keýdeshesinsiz bolýǵa tyıym salynady.
Sý kóligindegi qaýipsizdik erejelerin buzǵandardy kórgender bolsa, táýlik boıy jumys isteıtin Kólik komıtetiniń Ahýaldyq ortalyǵynyń senim telefonyna habarlasý kerek. 8 (71 72) 98-35-35, sondaı-aq foto jáne beıne materıaldardy What sApp messendjerine 8 708 088 08 00 jiberýge bolady.
