Qazaqstandaǵy saılaýdy myńnan astam sheteldik baıqaýshy qadaǵalaıdy

NUR-SULTAN. QazAqparat - Búgin elimizdiń Ortalyq saılaý komıssııasy 2019 jylǵy 9 maýsymǵa taǵaıyndalǵan QR Prezıdentiniń kezekten tys saılaýyna halyqaralyq uıymdar men shet memleketterdiń 46 baıqaýshysyn akkredıtteý týraly qaýly qabyldady, dep habarlaıdy QazAqparat tilshisi.

Atalǵan másele boıynsha baıandama jasaǵan OSK múshesi Záýresh Baımoldınanyń aıtýynsha, 3 maýsymda Syrtqy ister mınıstrliginen Táýelsiz Memleketter Dostastyǵynan baıqaýshylar mıssııasynyń 11 baıqaýshysyn jáne EQYU/DIAQB mıssııasynyń 2 baıqaýshysyn akkredıtteýge usynys túsken.

«Sonymen qatar 7 shet memleketten - Ulybrıtanııa, Kytaı, Úndistan, Palestına, Reseı Federatsııasy, AQSh, Grýzııadan 33 baıqaýshy usynylyp otyr. Olardyń ishinde Úndistan men Reseı Federatsııasy ortalyq saılaý organdarynyń ókilderi bar ekenin atap kórsetken jón. 46 baıqaýshynyń barlyǵy otyrysta akkredıtteýge shyǵarylyp otyr», - dedi ol.

Aıta keteıik, Ortalyq saılaý komıssııasy shet memleketter men halyqaralyq uıymdardyń baıqaýshylaryn akkredıtteýdi búgin saǵat 18.00-de aıaqtady. Osylaısha, Qazaqstan Respýblıkasy Prezıdentiniń saılaýyn baıqaý úshin 1 013 baıqaýshy akkredıtteldi. Onyń ishinde: 866 baıqaýshy 9 halyqaralyq uıymnan jáne 147 baıqaýshy 41 shet memleketten.

Baıqaýshylardyń jalpy sanynyń 43-i shet memleketterdiń ortalyq saılaý organdarynyń ókilderi. Sonymen qatar baıqaýshylar Eýropa, Azııa, Soltústik Amerıka, Ońtústik Amerıka qurlyqtarynan keledi.