Qazaqstandaǵy saılaýdan qandaı nátıje kútýge bolady - reseılik BAQ
ASTANA. QazAqparat - Qazaqstan bıligi sońǵy jyldary ekonomıkalyq jaǵdaıǵa den qoıýda reseılikterge qaraǵanda, kósh ilgerilik tanytyp keledi. Olar qıyndyqtyń aldyn oraýdy maqsat etýde, dep jazady snob.ru.
«2007 jyly Prezıdent N. Nazarbaev TMD-da alǵashqy bolyp ulttyq jáne álemdik ekonomıkaǵa tónip kele jatqan daǵdarys pen táýekelder jaıly sóz qozǵaǵan edi», delingen jazbada.
Qazir Qazaqstanda Parlamentke saılaý aldy naýqany júrip jatyr. Jergilikti saıasattanýshylardyń aıtýynsha, bul bılik pen basqarý júıesiniń ózgerýine alǵashqy qadam bolmaq jáne eldiń ekonomıkalyq problemalaryn sheshýge járdemdesýi tıis. Nursultan Nazarbaev qaı iste de aldyn ala qam jasaıtyndyǵy belgili. Alaıda Qazaqstandaǵy saılaýdyń (daýys berý 20 naýryzda) maqsaty - eldiń saıası júıesin zańnamalyq bılikke yqpal etý jaǵyna aýdarý. Bul basqarý shoǵyryn jańartýǵa járdemdesýi tıis. Buǵan belsendi jastar men kásibı mamandardy tartý qajet. Olarǵa jahandyq daǵdarys jaǵdaıynda tyń sheshimder izdeý, sondaı-aq el úshin jańa naryqtyq tetikter ázirleý júkteledi. Qazaqstandyqtar kadrlyq jańartý ekonomıkaǵa oń yqpal etip, bızneske barynsha bostandyq beretinine senimdi.
Qazaqstanda turaqty júrgizilip kele jatqan bıznestiń jumysy úshin jaǵdaılardy jeńildetý kapıtaldardy, onyń ishinde reseılik kapıtaldardy arttyrdy. «Jańa adamdar» aǵymdaǵy syn-qaterlerge neǵurlym tıimdi den qoıyp, memleketke járdemdesýi qajet. Bir qyzyǵy, 2012 jyly da Qazaqstanda kezekten tys saılaý ótken. Onda Eýrazııalyq ekonomıkalyq odaq qurý máselesi sheshilip jatqan bolatyn. Qazirgi kún tártibi kúrdeli, óte serpindi álemdik naqtylyq, naryqtyq, saıası jaǵdaıǵa negizdelgen. Búginde Qazaqstan úshin mańyzdy QHR men Reseıdiń syrtqy naryqtardaǵy jaǵdaı - aýyr.
Qazaqstan azamattarynyń basym bóligi kezekten tys saılaýdy qoldady, muny prezıdenttiń eldi jańartý josparyn maquldaý retinde baǵalaýǵa bolady. Saýalnamaǵa qatysqan azamattardyń 95,4 paıyzy partııalarǵa jańa senim mandatyn alý qajettigine senimdi. Sońǵy ýaqytqa deıin parlamentte «Nur Otan» partııasy basym tústi. «Aq jol» partııasy men Kommýnıstik halyqtyq partııasynyń da depýtattyq mandaty boldy. Kóptegen jergilikti sarapshylar qalyptasqan teńgerimge oń baǵa berýde. Olar parlamentte jarqyn kóshbasshylar men jańa tulǵalar paıda bolýyn kútýde. Merziminen buryn ótkizilgen saılaý aqsha men ýaqytty da únemdeıtini de nazarǵa alynǵan. Saıasattanýshylar Qazaqstan halyqaralyq ashyqtyq standarttary boıynsha saılaý ótkizýge ázirlenip jatqanyn atap ótýde.
Aldaǵy saılaý Qazaqstan ekonomıkasyna orasan ózgeris ákeletinine kúmán joq. El daǵdarysty eńserýmen bastalýy tıis ekinshi jańǵyrtý kezeńine aıaq basty. Al bul mindetti sheshý kóbinese jańa depýtattarǵa júkteletini belgili. 2016 jyldyń basynda saılaý úderisin ótkizgen soń, olar ekonomıkalyq mindetterdi sheshýge jumyla kirisý nıette.
«Astanada bıliktiń daǵdarysty eńserýge belsendi den qoıǵany birden baıqalady», delingen maqalada.
