Qazaqstandaǵy saılaý tranzıttik protseske núkte qoıady - Erlan Qarın

NUR-SULTAN. QazAqparat - QR Prezıdentiniń keńesshisi Erlan Qarın Memleket basshysynyń kezekten tys prezıdent saılaýyn ótkizý týraly úndeýine qatysty pikir bildirdi, dep habarlaıdy QazAqparat tilshisi.

«Qazaqstan Prezıdenti Qasym-Jomart Toqaev tyńǵylyqty paıymmen barlyq pikirlerdi eskere otyryp, saılaý ótkizý týraly sheshim qabyldady. Eń birinshi kezekte, Prezıdent Elbasymen aqyldasty. Parlament palatalary basshylarymen, Premer-mınıstrmen, Konstıtýtsııalyq Keńestiń tóraǵasymen keńesti. Jetekshi saıası partııalardyń kóshbasshylarymen kezdesti», - deıdi Erlan Qarın.

Osylaısha, Qarınniń aıýynsha, kezekten tys prezıdenttik saılaý ótkizý týraly sheshim barlyq saıası protsedýralardy saqtaı otyryp qabyldanýda.

«Qazaqstandaǵy saılaý tranzıttik protseske núkte qoıady. Demek, atalmysh mańyzdy suraqtyń barlyq qoǵamdyq-saıası aspektileri eskerildi. Sol sebepti, saılaý ótkizý - eldegi negizgi qoǵamdyq-saıası kúshterdiń úılesken oıy», - deıdi ol.

QR Prezıdentiniń keńesshisi saılaýdyń arqasynda kún tártibindegi suraqtardyń bárine de núkte qoıylatynyna basa nazar aýdardy.

«Sońǵy ýaqytta ártúrli áńgimeler aıtylyp, halyq kóp saýalǵa jaýap izdeı bastady. «Bizdi ne kútip tur?», «Ary qaraı ne bolady?» degen sııaqty... Mine, dál búgin júrgizilip jatqan reformalardyń qarqynyn báseńdetpes úshin Prezıdent osy suraqtardyń bárine núkte qoıýdy sheshti. Osylaısha, saılaý belgisizdik kóńil-kúıin eskerýge kómektesedi. Memleket basshysy «Prezıdent eldiń tańdaýy boıynsha saılanady» degen sózdi tekke aıtqan joq. Mine, bul - onyń úndeýindegi negizgi kilt sóz», - deıdi Erlan Qarın.

Eske sala ketsek, aǵymdaǵy jyldyń 9 maýsymynda elimizde kezekten tys prezıdent saılaýy ótedi. Bul týraly búgin respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev aıtty.

Memleket basshysy Qasym-Jomart Toqaevtyń respýblıkalyq telearnalar arqyly Qazaqstan halqyna joldaǵan úndeýiniń tolyq mátinin myna siltemeden oqýǵa bolady.