Qazaqstandaǵy saılaý patrıotızm kúni sekildi ásermen ótip jatyr - AQSh saıasattanýshysy

ASTANA. QazAqparat - Qazaqstandaǵy saılaý patrıotızm kúni sekildi ásermen ótýde. Búgin elimizde ótip jatqan kezekten tys Prezıdent saılaýyna oraı ótken baspasóz máslıhatynda AQSh baıqaýshylar mıssııasynyń ókili, saıasattanýshy Djeıkob Zenn osylaı málimdedi.

AQSh baıqaýshylar mıssııasy Astana qalasyndaǵy birqatar saılaý ýchaskelerinde bolyp, sonyń qorytyndylaryn jarııalap, óz áserlerimen bólisken bolatyn.

«Men saılaý ýchaskelerine barǵanda, kóptegen adamdardyń saılaýǵa belsendi qatysýyn kórdim. Olardyń kóńil-kúıi joǵary. Men tipti búgin sizderde patrıotızm kúni ekenin kórip otyrmyn», - dedi amerıkalyq saıasattanýshy Djeıkob Zenn brıfıng barysynda.

Sonymen qatar ol Astanadaǵy birqatar saılaý ýchaskelerin aralaǵanyn aıtyp, onda bári ashyq bolǵanyn, ózderiniń saýaldaryna túsinikti jaýap alǵanyn jetkizdi. Onyń aıtýynsha, eshqandaı kedergiler men túsinbeýshilikter bolmaǵan. Ózi barǵysy kelgen saılaý ýchaskelerin aralap, tıisti jaýaptaryn da alǵan. «Bul kúndi keremet uıymdastyryp jatyrsyzdar, barlyq jerlerde mýzyka, karaoke. Sizderdegi bul saılaý naýqany men bolǵan basqa elderge qaraǵanda qyzyqtyraq», - degen saıasattanýshy Qazaqstannyń demokratııany damytý salasyndaǵy jetistikterin de joǵary baǵalady. «Sońǵy ýaqytta biz Qazaqstandaǵy azamattyq belsendilikti kórip otyrmyz. Azamattar saılaýǵa qatysqandaryn maqtan tutady. Osynyń ózi zor jetistik», - dedi Djekob Zenn.