Qazaqstandaǵy saılaý oqys oqıǵasyz ótti - moldovalyq baıqaýshy

ASTANA. QazAqparat - Qazaqstandaǵy saılaý oqys oqıǵasyz ótti. Bul týraly búgin Moldova Respýblıkasy Ortalyq saılaý komıssııasynyń múshesi Svetlana Gýtý aıtty.

«Qazaqstandaǵy saılaýdyń óte tynysh ótkendigin, adamdardyń barynsha dostyq peıilde bolǵanyn atap ótkim keledi. Eshqandaı tosyn oqıǵa bolmady, bári ózderiniń daýystaryn berdi. Biz bolǵan saılaý ýchaskesinde kezek mol boldy. Biraq, adamdar saılaý zańnamasyn buzbaı, tynysh jaǵdaıda daýystaryn berip jatty. Ózińdi qyzyqtyrǵan sátti bilýge de múmkindik bar. Barlyq adamdarǵa birden jaýap berilip otyrdy», - dedi ol QR Ortalyq saılaý komıssııasynda ótken baspasóz máslıhaty barysynda.

Sonymen qatar Svetlana Gýtý saılaýdyń halyqaralyq standartqa saı joǵary deńgeıde ótkendigin basa atap ótti.

«Sizder oǵan laıyqsyzdar. Qazaqstan jaıynda tipti postkeńestik keńistikten de tysqary jerlerde sóz qozǵalýy tegin emestigine kóz jetkizdik», - dedi S.Gýtý.