Qazaqstandaǵy saryshunaq aıaz dúıim jurtty qalaı biriktirdi
Aptaǵa sozylǵan aıaz oqýshylarǵa kezekten tys demalys berdi. 22 qańtardan bastap Aqmola, Pavlodar (-40 gradýsqa jetken), Soltústik Qazaqstan (-30), Qostanaı (-27) oblystarynda sabaq toqtatyldy. Bet qaratpaıtyn úskirik Qaraǵandy men Aqtóbe oblystarynyń da oqýshylaryn da sabaqtan «bosatty».
Ókinishke qaraı, dúısenbi kúni Aqmola oblysynda úsikten kóz jumǵandar týraly qaraly aqparat kele bastady. Polıtsııanyń habarlaýynsha, jan tapsyrǵandardyń bári de ishimdik ishken.
Al Qostanaı oblysynda jigitimen sózge kelip qalǵan boıjetken kıkiljińge bola ómirimen qoshtasa jazdady. Ol kólikten shyǵyp ketip, -28 gradýstyq aıazda basy aýǵan jaqqa júre bergen. Aqyry, adasyp ketip, qatty tońyp qalsa kerek. Jigit izdeýge shyqqanymen ózi taba almapty. Qutqarýshylar áýejaı jaqta esinen tanyp qulap qalǵan boıjetkendi taýyp aldy. Baǵyna qaraı, boıjetken aman qaldy.
Dál osy kúni Soltústik Qazaqstan oblysynyń polıtsııa qyzmetkerleri Kellerovka aýylynyń 43 jastaǵy turǵynyn qutqaryp qaldy. Ol ot jaǵylmaǵan úıde uıyqtap qalǵan. Tártip saqshylary jalǵyz turatyn adamnyń esigin qaǵyp shaqyra almaı qoıypty. Aqyry, quqyq qorǵaýshylardyń esikti buzyp kirip, jalǵyzilikti adamnyń jaǵdaıyn bilýde basqa amaly qalmaǵan. Qatty sýyqtan dıvanda jatqan er adam esin jınaı almaı-aq qoısa kerek. Jergilikti aýrýhanaǵa jetkizilgen ol aman qaldy. Oǵan dany ashyǵan polıtsııa qyzmetkerleri oǵan qystyq etik pen tamaq satyp áperdi. 
SQO, Qostanaı oblystarynda TJ departamentteriniń jedel shtabtary quryldy. Mundaǵy maqsat - qutqarýshylardyń jumysyn úılestirý bilý. Oblystarda joldar jabyldy. Óskemende aıazdyń saldarynan birqatar avtobýstar jolǵa shyǵýdan qaldy. Tasymaldaýshylar Novsibir, Pavlodar men Semeı baǵytyndaǵy avtobýs reısterin toqtatty.
Qazaqstannyń barlyq oblystarynyń túkpir-túkpirinde Qyrǵyzstannan, Ózbekstannan, Tájikstan men Reseıden kelgen jolaýshylardyń qutqarylǵany týraly aqparat kelip jatty. Bir qýanarlyǵy, eshqaısysynda qaıǵyly jaǵdaı tirkelmegen. Tas jolǵa jaqyn eldi mekenderde jylyný pýnkteri ashylyp jatty.
Jalpy, bul jolǵy aıaz Astana men Qazaqstannyń ózge óńirleriniń halqyn qytymyr qystyń minezine qarsy biriktirip jiberdi dese de bolady . Aıaldamalarda eriktiler ystyq shaı berip, jalǵyz turatyn zeınetkerlerge kómektesti. 
Premer-mınıstr Baqytjan Saǵyntaev jumys berýshilerge qyzmetkerlerin kóp ustamaýǵa shaqyrdy. Astanadaǵy áýejaı men vokzaldarynda turaq qyzmeti ýaqytsha tegin boldy. Meshitter tegin taksı qyzmetin usyndy. Jasaǵan jaqsylyq jaýapsyz qalǵan joq. Máselen, Óskemenniń ákimi aıazdy kúnderi aınalasyndaǵy jurtqa meıirimdilik tanytyp júrgen avtokólik ıelerine 50 lıtr benzınnen taratyp berdi.
Biraq, aıazdy kúnderi qaltany qampaıtýdy oılaǵandar da tabyldy. Máselen, avtokólikterdi jylytý baǵasy 5 myńnan 20 myńǵa kúrt qymbattap ketti. Astanalyqtar áleýmettik jelide atalǵan qyzmettiń baǵasy 30-dan 50 paıyzǵa qymbattap ketkenin jazyp shaǵymdanyp jatty.
Aptanyń sońyna qaraı ahýal az da bolsa jaqsara bastady. Bárinen buryn balalar úshin sabaqtyń bolmaıtyny qýantqany bolmasa, dúıim jurttyń kóbin aıazdyń ábigerge salǵany shyndyq. Dese de, aldaǵy birneshe táýlikten keıin Qazaqstanda kún jylıtyn boldy.
Osylaısha, Qazaqstan 2018 jyldyń eń aıazdy kúnderin shyǵaryp salǵaly jatyr.