Qazaqstandaǵy sanıtarlyq-epıdemıologııalyq jaǵdaı kúrdeli – VAK

NUR-SULTAN. QazAqparat – Qazaqstandaǵy sanıtarlyq-epıdemıologııalyq jaǵdaı kúrdeli. Bul týraly QR Premer-Mınıstri Asqar Mamınniń tóraǵalyǵymen ótken QR aýmaǵynda koronavırýs ınfektsııanyń taralýyna jol bermeý jónindegi vedomstvoaralyq komıssııanyń (VAK) otyrysynda málim boldy, dep habarlaıdy QazAqparat.

Otyrysta málim bolǵanyndaı, COVID-19-ben syrqattanýshylar sany artýda. Koronavırýstyń delta shtammynyń ósýi barlyq aımaqta tirkelgen.

Vırýstyń reprodýktıvtik ındeksi – 1,2, ınfektsııalyq tósek oryn júktemesi – 43%, reanımatsııalyq tósek oryn – 35%. Koronavırýstyń taralý qarqyny boıynsha 12 óńir «qyzyl aımaqta» tur: Nur-Sultan, Almaty jáne Shymkent qalalary, Aqmola, Aqtóbe, Atyraý, Batys Qazaqstan, Qaraǵandy, Qostanaı, Mańǵystaý, Pavlodar jáne Soltústik Qazaqstan oblystary. «Sary aımaqta» Almaty, Jambyl jáne Qyzylorda oblystary, «jasyl aımaqta» – Shyǵys Qazaqstan jáne Túrkistan oblystary tur. Búgingi tańda 4,6 mln-nan astam adam nemese vaktsına alýǵa jatatyn adamdardyń 46,5%-y birinshi komponentti, 2,5 mln-nan astam adam ekinshi komponentti aldy. Halyqty vaktsınamen qamtýdyń eń tómen kórsetkishi Mańǵystaý oblysynda – 23,6%, Batys Qazaqstan jáne Aqtóbe oblystarynda 39%-dan baıqalady.