Qazaqstandaǵy reformalar oń nátıje berip keledi - Elbasy
«On jyl buryn Parlament ókilettigin keńeıtý úderisi iske qosylǵan bolatyn. Biz kezeń-kezeńmen bıliktiń barlyq tarmaqtarynyń áleýetin kúsheıttik. Osy oraıda Parlament pen Úkimetke qajetti tetikterdi bólip berdik. Osynyń aldyndaǵy reformalar ońtaıly nátıjelerdi berdi, halyq jáne álemdik qoǵamdastyq tarapynan jaqsy qabyldandy. 25 jyl ishinde qol jetkizgen nátıjeler týraly ótken jyly bul mereıtoıdy atap ótý kezinde keńinen aıtylǵan bolatyn»,-dep toqtaldy Elbasy.
Memleket basshysy alaıda jahandyq táýekelder joǵarylap otyrǵanyn aıta kele, osy rette Qazaqstan saıası jańǵyrýdyń tereńirek kezeńine aıaq basqanyn, endi Qazaqstan osy túzetýlerdi qabyldaǵannan keıin 21 ǵasyrdyń saıası kúntizbesiniń jańa paraǵyn ashatyndyǵyn jetkizdi.
«Birinshiden, jańa Zań memlekettik isterde Parlamenttiń rólin aıtarlyqtaı kúsheıtedi, onyń ishinde Úkimetti qalyptastyrý kezinde ókilettik artady»,-dedi N. Nazarbaev.
Sonymen qatar Prezıdent Úkimettiń derbestigi joǵarylaıtynyn, ıaǵnı Mınıstrler kabınetine ekonomıkany tikeleı basqarý boıynsha ókilettik beriletinin, el azamattarynyń quqyǵyn qorǵaýda Joǵarǵy Sottyń róli kúsheıetinin, sondaı-aq Konstıtýtsııalyq qadaǵalaýdyń júıesi nyǵaıtylatynyn atap ótti.
