Qazaqstandaǵy prezıdenttik saılaý el halqynyń odan saıyn birige túsýine yqpal etti - Belarýs Respýblıkasynyń ókili
ASTANA. 4 sáýir. QazAqparat /Gúlmıra Álıakparova/ - Qazaqstandaǵy kezekten tys prezıdenttik saılaý el halqynyń odan saıyn birige túsýine yqpal etti.
Bul pikirin búgin Astanada jýrnalısterge bergen baspasóz máslıhatynda Belarýc Respýblıkasy Saılaý jáne respýblıkalyq referendýmdardy ótkizý boıynsha ortalyq komıssııanyń hatshysy Nıkolaı Lozovık bildirdi.
«Men Belarýssııa ókili retinde aıta alamyn, bizdiń respýblıkada saılaý kezinde saıası teketirester «qyza» túsedi jáne saıası-qoǵamdyq shıelenister artady. Belarýssııadaǵy sııaqty mundaı úrdis ózge elderde de bar. Saılaý kezinde partııalar bılik organdaryna ózderiniń qandaı da bir narazylyqtaryn bildire bastaıdy. Azamattar da ózderiniń jeke bastaǵy problemalaryn aıtyp qalý úshin sony tosady. Keıbir memleketterde saılaýdy syndarly emes kúshter bılikke qarsy shyǵý, tipti ony Konstıtýtsııalyq emes amaldarmen qulatý áreketteri úshin paıdalanylady. Al Qazaqstanda biz ondaıdy baıqaǵanymyz joq. Qazaqstanda saılaý naýqany qoǵamnyń odan saıyn birige túsýine yqpal etti. Bul óte mańyzdy jáne osyndaı úrdis barlyq elderde bolsa deımiz», - dedi N.Lozovık.
Belarýssııa ókili atap kórsetkendeı, Qazaqstandaǵy kezekten tys prezıdenttik saılaýdy Belarýssııanyń barlyq 16 ókili baqylady.
«Bizdiń ortaq pikirimiz, saılaýǵa daıyndyq jáne ony ótkizý joǵary deńgeıde uıymdastyryldy. Saılaý ýchaskeleri saılaý zańnamasyna sáıkes jabdyqtaldy. Daýys berýshige óz tańdaýyn jasaýǵa bar múmkinshilikter jasaldy. Saılaý komıssııasynyń daıyndyǵyn erekshe atap ótkim keledi. Daýys berýshilerdiń legi artqan kezde olarǵa qarbalas jaǵdaıda jumys isteýine týra keldi. Olar saılaý zańnamasymen jaqsy tanys jáne ony praktıkada qoldandy. Sondyqtan saılaý komıssııasy múshelerine shaǵymdar túsken joq. Belarýssııalyq baıqaýshylar Qazaqstanda ótken prezıdenttik saılaýǵa «úzdik» degen joǵary baǵa berdi», - dep túıindedi sózin ol.
