Qazaqstandaǵy prezıdenttik ınstıtýttyń qurylǵanyna 20 jyl tolýyna oraı Almatyda halyqaralyq ǵylymı-tájirıbelik konferentsııa ótip jatyr

dep habarlaıdy QazAqparat.

Sharanyń negizgi maqsaty - memlekettiń áleýmettik, ekonomıkalyq jáne saıası túrlenýin jan-jaqty talqylap, memlekettiń negizgi saıası modeli - prezıdenttik ınstıtýttyń jetistigin baǵalaý.

Konferentsııa barysynda zańger-ǵalymdar, saıasattanýshylar, kórnekti qoǵam qaıratkerleri qoldanystaǵy Konstıtýtsııa qurǵan prezıdenttik ınstıtýt modeliniń tıimdiligi, onyń daǵdarystan keıingi kezeńdegi jáne jańa álemdik tártip jaǵdaıyndaǵy damý perspektıvalaryn aıqyndaý jaıynda baıandamalar oqyp, talqylady.

Atalmysh sharany Respýblıka Konstıtýtsııalyq Keńesi, Almaty qalasynyń ákimdigi jáne Ál-Farabı atyndaǵy Qazaq ulttyq ýnıversıteti, Syrtqy ister mınıstrligi, Bilim jáne ǵylym mınıstrligi, Baılanys jáne aqparat mınıstrligi, D.A.Qonaev atyndaǵy ýnıversıtet, «Zańgerler ádil saılaý úshin» qoǵamdyq birlestigi men Quqyqtyq zertteý jáne taldaý ınstıtýttary uıymdastyryp otyr.

Sáýirdiń 23-ne deıin jalǵasatyn konferentsııaǵa Prezıdent Ákimshiligi, Respýblıkanyń ortalyq memlekettik organdar ókilderi, QR Parlamentiniń depýtattary, Qazaqstanda tirkelgen dıplomatııalyq ókildikterdiń, halyqaralyq uıymdardyń, azamattyq qoǵam ınstıtýttarynyń ókilderi, sondaı-aq otandyq jáne sheteldik belgili ǵalymdar qatysýda.