Qazaqstandaǵy prezıdenttik ınstıtýttyń 20 jyldyq damý qorytyndysyna arnalǵan halyqaralyq ǵylymı-praktıkalyq konferentsııa ótedi
ASTANA. Sáýirdiń 20-sy. QazAqparat - Sáýirdiń 22-23-inde Qazaqstandaǵy prezıdenttik ınstıtýttyń 20 jyldyq damý qorytyndysyna arnalǵan «Qazaqstan Respýblıkasyndaǵy prezıdenttik ınstıtýt: tarıhy jáne qazirgi kezeńi» atty halyqaralyq ǵylymı-praktıkalyq konferentsııa ótedi. Bul aqparatty QR Konstıtýtsııalyq Keńesiniń baspasóz qyzmeti taratyp otyr.
«Konferentsııany ótkizýge elimizdiń zańgerler qaýymy bastama jasady. Prezıdenttik ınstıtýttyń qazaqstandyq konstıtýtsııalyq-quqyqtyq modeliniń qyzmet atqarý tájirıbesiniń teorııalyq jáne praktıkalyq qyrlaryn jan-jaqty taldaý, onyń ári qaraı damý perspektıvalaryn anyqtaý qajettiligi konferentsııany ótkizýge sebep boldy», delingen baspasóz habarlamasynda.
Konferentsııany QR Konstıtýtsııalyq Keńesi, Almaty qalasynyń ákimdigi, Syrtqy ister, Bilim jáne ǵylym, Baılanys jáne aqparat mınıstrlikteri, Ál-Farabı atyndaǵy Qazaq ulttyq ýnıversıteti, «Zańgerler ádil saılaý úshin» qoǵamdyq birlestigi jáne Quqyqtyq zertteý jáne taldaý ınstıtýtynyń qatysýymen uıymdastyrylady.
Konferentsııaǵa Prezıdent Ákimshiliginiń basshylary, respýblıkanyń ortalyq memlekettik organdary, QR Parlamentiniń depýtattary, Qazaqstanda tirkelgen dıplomatııalyq ókildikterdiń basshylary, halyqaralyq uıymdardyń, azamattyq qoǵam ınstıtýttarynyń ókilderi, sondaı-aq otandyq jáne sheteldik belgili ǵalymdar qatysady.
