Qazaqstandaǵy Prezıdent saılaýy Horvatııada talqylandy

ZAGREB. QazAqparat - Qazaqstannyń Horvatııadaǵy elshiligi «Qazaqstandaǵy kezekten tys Prezıdent saılaýy» taqyrybynda dóńgelek ústel ótkizdi, dep habarlaıdy «QazAqparat» HAA QR SІM baspasóz qyzmetine silteme jasap.

Sharaǵa Horvatııanyń belgili qoǵam qaıratkerleri, úkimettik emes uıymdary men BAQ ókilderi qatysty.

Qazaqstan elshisi Tólejan Barlybaev qatysýshylarǵa saılaýǵa daıyndyq, QR Ortalyq saılaý komıssııasynyń qyzmeti, sondaı-aq saılaýaldy kampanııalary týraly baıandady.

Elshi Qazaqstandaǵy Prezıdent saılaýyn baqylaý úshin kóptegen halyqaralyq baqylaýshylardyń bolatynyn, ár eldiń, sonyń ishinde Horvatııanyń jýrnalısteri men ÚEU ókilderi keletinin jetkizdi.

Sharada saılaýdyń Qazaqstan bolashaǵyna, Qazaqstan-Horvatııa baılanystaryna yqpaly týraly pikirler aıtyldy. Horvat dıplomatııasynyń ardageri, burynǵy syrtqy ister mınıstri Býdımır Lonchar Qazaqstannyń qazirgi strategııalyq baǵytyn saqtaıtynyna, ádil, demokratııalyq saılaý ótkizýdi jaqtaıtyn QR Prezıdenti Qasym-Jomart Toqaevtyń ustanymdaryna toqtaldy.

Horvatııanyń burynǵy prezıdenti Stepan Mesıch Tuńǵysh Prezıdent - Elbasy Nursultan Nazarbaevtyń tarıhı róline ári memleket basshysy laýazymyn merziminen buryn tapsyrǵanyna joǵary baǵa berdi.

Dóńgelek ústel sońynda T. Barlybaev 2019 jylǵy 9 maýsym kúni 07:20-da Qazaqstannyń Zagrebtegi elshiliginde №287 saılaý ýchaskesi ashylatynyn jetkizdi.