Qazaqstandaǵy Pravoslav shirkeýinde dinı ǵıbadattardy qazaq tilinde ótkizýdiń búgingi kúni ózektiligi joq - Astana jáne Almaty Mıtropolıti Aleksandr
ASTANA. 30 qarasha. QazAqparat /Gúlmıra Álıakparova/ - Qazaqstandaǵy Pravoslav shirkeýinde dinı ǵıbadattardy qazaq tilinde ótkizýdiń búgingi kúni ózektiligi joq. Bul týraly búgin jýrnalıstermen ótken baspasóz máslıhatynda Astana jáne Almaty Mıtropolıti Aleksandr málim etti.
«Qazaqstandaǵy Pravoslav shirkeýi negizinen orys tildi halyqtardy qamtıdy jáne bizdiń ǵıbadattarymyz shoqyndyrylý arqyly bizdiń shirkeýge jatatyndarǵa arnalǵan. Qazaqstanda qandaı da bir dinge jatpaıtyn adamdar joq dep senemin. Qazaqstan halqynyń basym denin musylmandar, sondaı-aq hrıstıandar quraıdy. Biz basqa dinge tartý isimen aınalyspaımyz, sebebi baýyrlas-musylmandardyń tarıhı sheshimderin qurmetteımiz. Óz kezeginde olar bizdiń tańdaýymyzǵa qurmetpen qaraıdy. Al Qazaqstandaǵy pravoslav shirkeýlerindegi ǵıbadattardyń qaı tilde ótkiziletindigi týraly másele, biz úshin búgingi kúni ózekti emes», - dedi ol.
Astana jáne Almaty Mıtropolıti, óziniń Rojdestvo merekesi qarsańyndaǵy jáne Orys Pravoslav shirkeýi basshysynyń rojdestvolyq jáne pasha aldyndaǵy quttyqtaýlarynyń qazaq tilinde aıtylýy - kez-kelgen táýelsiz memleket úshin qalypty úrdis ekendigin qadap aıtty.
«Buqaralyq aqparat quraldarynyń bizdiń pozıtsııamyzdy burmalaý áreketteri búgingi ómirdiń shyndyǵyna sáıkes kelmeıdi», - dedi ol.
Esterińizge sala keteıik, buǵan BAQ-tar Qazaqstandaǵy Pravoslav shirkeýi aldaǵy ýaqytta ǵıbadattaryn qazaq jáne orys tilderinde júrgizetindigin, sondaı-aq qazaq tilinde dinı ádebıetterin shyǵaryp, resmı saıttaryn júrgizetindigin habarlaǵan bolatyn. Onymen birge, Almatyda jańadan ashylǵan dinı semınarııanyń oqytý baǵdarlamasyna qazaq tilin meńgerý mindetti páni engizilip, negizgi dinı joralǵylardyń mátini qazaqshaǵa aýdarylyp jatqany aıtyldy.
