Qazaqstandaǵy parlamentarızm Tuńǵysh Prezıdent tarapynan jasalǵan strategııalyq basshylyq, saıası úılesimdilik pen tórelik arqasynda júzege asty - I. Rogov
ASTANA. 28 qarasha. QazAqparat - Qazaqstandaǵy kásibı parlamentarızmniń qalyptasýy jáne onyń damýy barysy Tuńǵysh Prezıdent tarapynan jasalǵan strategııalyq basshylyq, saıası úılesimdilik pen tórelik arqasynda júzege asty. Búgin Astanada ótken «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda QR Konstıtýtsııalyq Keńesi tóraǵasy Igor Rogov osylaı málim etti.
«Táýelsizdik tarıhyndaǵy tuńǵysh Konstıtýtsııa da ońaıdan qalyptasa qalǵan joq. Ol boıynsha arnaıy jumys toby qurylyp, keıinnen ol konstıtýtsııalyq komıssııaǵa jobany tapsyrdy. Ondaǵy pikirtalastar qyzý, qatal órbip, onyń kóptegen músheleri, sonyń arasynda Joǵarǵy Keńes basshylyǵy keńestik kezeńdegi vertıkal bılikten bas tartýǵa kóndikkisi kelmedi. Memleket, qoǵam qaıratkerleri arasynda kásibı parlamentke qatysty ortaq ustanym da joq bolatyn. Bireýsi qos palataly parlament ıdeıasyn qoldasa, endi biri dál sol Joǵary Keńesti birshama ókilettik ózgeristerimen saqtaýdy quptady. Bundaı jaǵdaıda 1993 jyly Joǵarǵy Keńes tuńǵysh ret Qazaqstannyń kompromıstik Konstıtýtsııasyn qabyldaǵan bolatyn, onda qos palataly parlament ıdeıasy qabyldanbaǵan edi», - dep esine ala sóıledi tóraǵa I. Rogov. Onyń aıtýynsha, Joǵarǵy Keńes ilgeridegi taptaýrynmen jumysyn jalǵastyryp, qoǵamdyq, memelekettik damýdyń tejegishine aınaldy. Buny az ýaqyttyń ishinde depýtattardyń ózderi de túsine bastaǵan edi. Dál sondyqtan da Joǵarǵy Keńes ózin-ózi taratqany tarıhtan belgili. Al budan keıingi saılanǵan Joǵarǵy Keńes te burynǵy keńestik júıe qaldyqtarymen qyzmet etkendikten ǵumyry kópke barǵan joq.
«Sondyqtan da memlekettilikti nyǵaıtý, jańa konstıtýtsııalyq qurylymdy qalyptastyrý, naryqtyq ekonomıkaǵa kóshý, barlyq baǵytta keń aýqymdy reforma ótkizýdiń kezek kúttirmes sharalary Elbasy N. Nazarbaevtyń jańa Konstıtýtsııany ázirleý bastamasyna negiz boldy. Sol arqyly kásibı qos palataly Parlament dúnıege keldi. Jalpy parlamentarızm dástúri azamattyq qoǵamy damyǵan, halqynyń qalyń jiginde joǵary saıası mádenıettilik qalyptasqan, qoǵamdyq kelisim ornaǵan jerde myǵym bolady. Al álemdegi tájirıbeniń ózi parlamentarızmniń demokratııanyń ajyramas negizgi bóligi ekenin kórsetedi. Osy aıtylǵandardy túıindeı kelsek, Qazaqstandaǵy kásibı parlamentarızmniń qalyptasýy jáne onyń damýy barysy Tuńǵysh Prezıdent tarapynan jasalǵan strategııalyq basshylyq, saıası úılesimdilik pen tórelik arqasynda júzege asty. Bul úderistiń ózi qoǵamnyń demokratııalanýymen tyǵyz baılanysty dúnıe», - dedi Konstıtýtsııalyq Keńes tóraǵasy.
