Qazaqstandaǵy ózin-ózi jumyspen qamtyǵandar sany jalpy eńbekpen qamtylǵandardyń 33,3 paıyzyn quraıdy

Búgin QR Parlamentiniń Májilisinde «Jumyspen qamtý - 2020» baǵdarlamasy taqyrybynda ótip jatqan Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.

Mınıstrdiń aıtýynsha, elimizdiń eńbek naryǵynda sońǵy 10 jyldyqta oń ózgerister kórinis tapqan. Atap aıtqanda, halyq sany 1,8 mıllıonǵa artsa, jaldamaly jumysshylar sany 1,7 mıllıonǵa ósken. Munyń ózi jańadan qurylǵan jumys oryndarynyń da artqandyǵyn bildiredi. Al qazaqstandyqtardyń naqty kirisi 2,6 esege joǵarylaǵan.

«Bilim alýshylar sany da 1,5 esege ósti - bul bolashaq úshingi bilikti kadrlar. Jumyssyzdar sany da 1,5 esege tómendedi. Alaıda, ózin-ózi jumyspen qamtýshylardyń kórsetkishi esh ózgerissiz qaldy»,-dedi mınıstr G. Ábdiqalyqova.

Bul rette vedomstvo basshysy ózin-ózi jumyspen qamtyǵandardyń eńbek naryǵyndaǵy aýqymdy eńbek rezervi bola alatynyn atap ótti. «2010 jyly eldegi jumyspen qamtylǵandardyń sany 8,1 mln. adamdy qurady. Olardyń ishinde jaldamaly jumysshylar 5,4 mln. adam, nemese jalpy jumyspen qamtylǵandardyń 66,7 paıyzyn qurasa, ózin-ózi jumyspen qamtyǵandar sany 2,7 mln. adam nemese 33,3 paıyzdy qurap otyr. Sondyqtan da ózin-ózi jumyspen qamtyǵan tulǵalardyń máselesi bizdiń elimiz úshin ózekti»,-dedi mınıstr.