Qazaqstandaǵy Ózbekstan jyly: Qyzylordada ózbek ónerpazdary án shyrqady
QYZYLORDA. QazAqparat - Qyzylorda qalasyndaǵy «Dostyq úıinde» Ózbekstannyń Navoı oblysynan kelgen ónerpazdar jergilikti jurtshylyqqa óz tartýyn jasady. Bul shara bıyl atap ótilip jatqan Qazaqstandaǵy Ózbekstan jyly aıasynda qolǵa alynyp otyr, dep habarlaıdy QazAqparat tilshisi.
Kórshiles qonǵan týys halyq «Qany bir elim, jany bir elim» atty kontserttik baǵdarlamasynda ózbek ánderi men bılerin naqyshyna keltire oryndady. Sondaı-aq, sol eldegi qazaq ónerpazdary da án men kúıden shashý shashty. Kontserttik baǵdarlamada 20-ǵa jýyq ónerpaz eldiń qoshemetine bólendi.
«Syr óńiri turǵyndarynyń qonaqjaı qasıeti bizge óte unady. Bul jaǵynan bir-birimizge óte uqsaspyz. Sondaı-aq, qos halyqtyń mádenıeti men salt-dástúrinde erekshe aıyrmashylyq joq ekeni belgili. Biz Qazaqstandaǵy Ózbekstan jyly aıasynda basqa da sharalardy josparlap otyrmyz. Astana qalasynda ózbektiń ulttyq kıimderi men mádenıetine arnalǵan kórme ótkizý oılastyrylǵan», - dedi Navoı oblysy ákiminiń orynbasary Ýlýgbek Safarov.
Qazaqstandaǵy Ózbekstan jyly aıasynda elimizde 200-den astam shara ótkizý josparlanǵan. Mundaı ıgi sharalar negizinen elimizdiń ońtústik bóligindegi Taraz, Shymkent, Túrkistan jáne Qyzylorda qalalarynda ótkizilip keledi.
