Qazaqstandaǵy otbasylardyń 15 paıyzy bedeýlikten zardap shegýde
Bul týraly QR Densaýlyq saqtaý jáne áleýmettik damý vıtse-mınıstri Svetlana Jaqypova málim etti.
«Elimizde analar ólimi 3,7 esege kemidi. Eger 2006 jyly onyń úlesi 100 myń áıelge shaqqanda 45,6 oqıǵa bolsa, qazir onyń kólemi - 12,3 áıel. Nárestelerdiń shetineýi 1,5 ese azaıdy», - dedi vıtse-mınıstr.
Jynystyq qatynas arqyly taralatyn ınfektsııalardy erte bastan anyqtaý jáne ony emdeý júıesi jaqsardy. Tegin memlekettik medıtsınalyq qyzmetter tizimine áıelderdiń densaýlyǵyn skrınıngten ótkizý qyzmeti engizilip otyr.
«Osyndaı jaǵymdy ózgeristerge qaramastan, densaýlyq óte tómen deńgeıde saqtalýda. Nekeniń 15 paıyzy bedeýlikke ushyraǵan, bul jynystyq qatynastar arqyly taralatyn ınfektsııalardyń keń taralýynan, túsik jasatýdan oryn alýda. Qazaqstanda árbir besinshi júktilik túsikpen aıaqtalady», - dep atap ótti S.Jaqypova.