Qazaqstandaǵy orman órtiniń jartysyna jýyǵy naızaǵaıdan keledi – Bekker
NUR-SULTAN. QazAqparat – Qazaqstandaǵy orman órtiniń jartysyna jýyǵy naızaǵaıdan keledi. QR Tótenshe jaǵdaılar komıtetiniń tóraǵasy Vladımır Bekker orman órtteriniń sebebin taldaý jumystary osyndaı qorytyndyǵa ákelgenin aıtady, dep habarlaıdy QazAqparat tilshisi.
«Baıanaýyl aýdanyndaǵy órttiń shyǵý sebebi jaıly ázirge eshteńe aıta almaımyz. Jaǵdaıdyń mán-jaıy anyqtalyp jatyr. Osy ýaqytqa deıin bizde 570-ke tarta orman órti tirkeldi. Qyrkúıek aıyndaǵy órt oqıǵalaryna taldaý júrgizip otyrsaq, olardyń 42 paıyzy naızaǵaıdan kelgen. Kóbiniń adamı faktor áser etetinin aıtyp jatatyny belgili. Qyrkúıek aıy kelgennen-aq baıqap otyrsyz: klımattyq jaǵdaı ózgerip, kún sýydy, jańbyr jaýyp, naızaǵaı oınady. Búgin, erteń de eldiń birshama aýmaǵynda jańbyr jaýady. Daýyl turýynyń yqtımaldylyǵy 80-85 paıyz», - dedi Vladımır Bekker elordada ótken baspasóz máslıhatynda.
Komıtet tóraǵasy, sonymen birge, tabıǵı apattardan múlki qıraǵan nemese shóbi órtenip ketken azamattar qaıda barýy kerektigin jetkizdi.
«Azamattar eń aldymen, jergilikti atqarýshy organǵa jáne TJ organyna júginýi kerek. Arnaıy komıssııa tıisti tekserý jumystaryn júrgizip, kómek berý týraly sheshim qabyldanady», - dedi ol.
Eske sala ketsek, Baıanaýyl ulttyq parkindegi alapat órttiń aýyzdyqtalǵany búgin tańerteń habarlanǵan bolatyn. Oqys oqıǵadan eshkim zardap shekpegen.
Pavlodar oblysynyń ákimi Bolat Baqaýov pen oblystyq Tótenshe jaǵdaılar departamentiniń bastyǵy Ernur Ótegenov órt shyqqan oryndy tikushaqpen aralap shyqty. TJK buǵan deıin Baıanaýyldaǵy órt eldi mekenderge qaýip tóndirgenin jarııa etken.
