Qazaqstandaǵy oralmandardyń sany 1 mln. shamasynda bolsa, bulardyń 200 myńǵa jýyǵy óz kúshimen elge kelgender - Kóshi-qon komıteti
ASTANA. Sáýirdiń 15-i. QazAqparat /Qanat Mámetqazyuly/ - Qazirgi kúni oralmandardyń sany 1 mln. shamasynda bolsa, bulardyń 200 myńǵa jýyǵy óz kúshimen elge kelgender.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev osylaı málim etti, dep habarlaıdy QazAqparat.
«Táýelsizdik jyldarynda Qazaqstan taǵdyr tálkegimen shetelge shashyrap ketken qandastarymyzdy eline oraltýǵa jaǵdaı jasap, memleketimiz bul baǵytta erekshe úrdisti saıasatty júzege asyrdy. 1991 jyldan beri búgingi esep boıynsha elimizge 1 mln.-ǵa jýyq etnıkalyq qandastarymyz kelgen. Bulardyń 790 myńy Kóshi-qon komıtetiniń tizimine enip, tirkeýden ótip, oralman mártebesin aldy. Al qalǵan 200 myńdaıy óz kúshimen kóship kelgender. Jalpy, Qazaqstan álemdegi óz qandastaryn Otanyna qaıtarýǵa kúsh jumsap, jaǵdaı jasap, arnaıy saıasatqa basymdyq berip otyrǵan 5 memlekettiń bireýi», dedi Q. Ábishev.
Jalpy, komıtettiń derekterine qaraǵanda, 2010 jylǵy qańtardyń 1-indegi málimetter boıynsha, Qazaqstanda 201 myń 309 oralmandar otbasy nemese 789 myń 339 etnıkalyq qazaqtar ómir súrip jatyr. Otanyna oralǵan etnıkalyq qazaqtardyń barlyǵy Qazaqstan Respýblıkasy zańnamasynda qarastyrylǵan memlekettik kómekterge ıe bolǵan.
