Qazaqstandaǵy múgedek jandar jaǵdaıy Almatyda talqylandy
ALMATY. 28 jeltoqsan. QazAqparat /Erbol Turymbetov/ - Búgin Almatydaǵy «Qazjol» qonaq úıinde Qazaqstandaǵy múgedekterdiń jaǵdaıyn talqylaý jónindegi dóńgelek ústel ótti.
Ony QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men BUU-nyń turǵylyqty halyq salasyndaǵy qory (BUUTHSQ) birlese uıymdastyryp otyr.
Dóńgelek ústelde Qazaqstandaǵy zaǵıp jáne sańyraý múgedekterdiń áleýmettik-ekonomıkalyq jaǵdaıyn zerdeleý jónindegi kabınettik jáne áleýmettanýlyq zertteýlerdiń nátıjeleri usynyldy.
BUU THSQ Qazaqstandaǵy dırektory, BUU THSQ Ortalyq Azııa boıynsha aımaqtyq dırektory Nıkolaı Botev qazirgi qoǵamda múmkindigi shekteýli jandar sany azaımaı otyrǵanyn atap ótti. Sonymen qatar, olardyń qoǵamdaǵy bilim berý, jumyspen qamtý, qoǵamǵa kirigý men ómir súrý sapasy sııaqty birqatar máseleleriniń áli kúnge túıtkildi máseleler retinde qalyp otyrǵanyna toqtaldy.
«Respýblıkalyq dıagnostıkalyq ortalyq» AQ-nyń dırektorlar keńesiniń tóraǵasy, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa múshesi Beksultan Tutqyshev Qazaqstandaǵy múgedek jandar týraly statıstıkalyq málimettermen tanystyrdy. «Búginde elimizde 448,6 myń adam múgedek mártebesin ıelenip otyr. Bul jalpy halyqtyń 3 paıyzyn quraıdy. Olardyń tórtten úshi (75,4 paıyzy) eńbekke jaramdy jastaǵy adamdar bolsa, 17,5 paıyzy - balalar», - dedi B. Tutqyshev.
Onyń sózinshe, sonymen birge, 16 jastan asqan 20 myńnan astam zaǵıp jandar tirkelse, 19 myń adam sańyraý bolyp otyr.
Dóńgelek ústel barysynda Qazaqstandaǵy múgedekter jaǵdaıy men osy baǵytta atqarylyp jatqan sharalarǵa qatysty birneshe baıandamalar oqylyp, sol boıynsha talqylaýlar boldy.
Jıyn sońynda dóńgelek ústel qorytyndylary boıynsha, múgedek jandardyń medıtsına, áleýmet, jumyspen qamtý, sondaı-aq, reprodýktıvtik quqyqtary jáne basqa múmkindikterin qamtyǵan Qarar qabyldandy.
