Qazaqstandaǵy «Microsoft» bas dırektory aýysty
ASTANA. QazAqparat - Microsoft korporatsııasy 1 sáýirden bastap kompanııanyń Qazaqstandaǵy bas dırektorynyń aýysatynyn xabarlady. Atalǵan qyzmetke keletin Ronald Bınkofskı TMD-daǵy óńirlik keńsesin de qatar basqaratyn bolady, dep xabarlaıdy QazAqparat tilshisi Qazaqstannyń baspasóz klýbyna silteme jasap.
Jańa basshy Qazaqstan, Armenııa, Belarýs, Mońǵolııa, Qyrǵyzstan, Túrkimenstan, Tájikstan jáne Ózbekstan sekildi 9 memleket kiretin TMD aımaǵyndaǵy bıznesti damytýǵa jaýap beredi. Osy laýazymǵa deıin Ronald 4 jyl boıy Polshadaǵy Microsoft keńsesin, al onyń aldynda 2,5 jyl boıy Rýmynııadaǵy keńseni basqaryp kelgen.
«Búgingi jáne keleshektegi damý áleýeti zor osy aımaqtyń, eldiń bir bólshegine aınalyp otyrǵanyma asa qýanyshtymyn. Búkil bıznes salalary men jalpy ómirdiń sandyq ózgeristerge ushyraǵan dáýirinde biz klıentterimiz ben seriktesterimizge adal qyzmet etip, olarǵa tehnologııalardy endirip, damýǵa kómektesýdi komandammen birge jalǵastyrmaqpyz», - deıdi ol.
Ronald Bınkofskı "Microsoft" kompanııasynda 10 jyldan astam ýaqyttan beri eńbek etip keledi. Osy ýaqyttyń ishinde bıznesti basqarý, satylym, marketıng, operatsııalyq basqarý jáne ózgeristerdi basqarý isinde keń tájirıbe jınaqtap úlgergen. Ol Software AG kompanııasynda Ortalyq jáne Shyǵys Eýropadaǵy aımaqtyq menedjer bolyp mansabyn bastaǵan, osyǵan deıin óz bıznesin basqaryp kelgen. Ronald jańa qyzmette sońǵy bir jyl boıy osy laýazymdy atqaryp kelgen Konstantın Nazarovtyń ornyna kelip otyr.
