Qazaqstandaǵy meshitterdiń deninde ımamdardyń saýaty tómen - Q. Lama Sharıf

Búgin Májiliste QR Din isteri agenttiginiń qyzmetine arnalǵan Úkimet saǵatynda agenttik basshysy Qaırat Lama Sharıf osylaı málim etti.

«Bizdiń kúsh-jigerimiz tek qana Din isteri agenttiginiń aıasynda emes. Elimizdegi 2,5 myń meshit ımamdarynyń jat aǵymdarǵa qarsy turyp, olardyń durys sóılep, durys ýaǵyz aıtýyna nazar aýdarýdamyz. ıAǵnı, ımamardyń juma kúni aıtatyn ýaǵyzdary, oı-pikirleri jat aǵymdardyń jetegine qarsy baǵytta bolýy kerek», - dep atap ótti Q. Lama Sharıf.

Onyń aıtýynsha, jurtshylyq arasynda Hanafı mázhabyn dáripteý, nasıhattaý baǵytynda aýqymdy sharalar áli de jalǵasyn tabatyn bolady. Máselen, qyrkúıek aıynyń sońynda Taldyqorǵan qalasynda halyqaralyq konferentsııa josparlanyp otyr. Oǵan ıslamnyń bilikti ǵalym ókilderi qatysyp, halyqqa ál Matrýdı aqıdasynyń qyr-syry jaıy áńgimeleıtin bolady. Shara Dinı basqarmamen birlese ótkiziledi.

«Qazirgi ýaqytta Qazaqstan dinı basqarmasy men agenttik arasyndaǵy ózara túsinistik týraly memorandým ázirlep jatyrmyz. Bul asa mańyzdy qujat. Onda Dinı basqarma qoǵamda nege jaýap beretini, Din isteri agenttiginiń qyzmeti qamtylatyn bolady. Memorandýmnyń jáne bir máselesi - kadr», - dep atap ótti Q. Lama Sharıf.

«Shyndyǵynda Qazaqstanda 2320 meshit bolsa, solardyń kópshiliginde ımamdardyń dinı saýattylyǵy óte tómen. Basym bóligi 90-jyldary 3 aılyq kýrstardy bitirip-aq ımam bolyp júr. Bul úsh aıdyń ishinde ımam bolatyndaı qandaı dindi nasıhattaýǵa bolady. Islamdy ómir boıy oqý kerek. Sondyqtan da, óńirlerdegi ımamdardyń biliktiliginiń tómendigi jastarymyzdyń ınternet, basqa da kózder arqyly suraqtarǵa jaýap izdep ketýine ákep soǵyp jatyr», - dedi tóraǵa.

Sonymen qatar, agenttik basshysy meshitterde ýaǵyzdardyń mańyzdylyǵyn aıta kele, jamaǵat qajettiligine oraı keıbir aımaqtardaǵy ımamdardy basqa óńirlerdegi bilikti ımamdarmen almastyryp otyrý jaıyn qozǵady.