Qazaqstandaǵy meshitter jańa tártippen salynady
Basqarmanyń baspasóz qyzmetiniń habarlaýynsha, QMDB ǵulamalar keńesi bekitken qujat «Qazaqstan Respýblıkasynda tıptik jobadaǵy meshit ǵımaratyn salýdyń tártip erejesi» dep atalady.
«Bul elimiz boıynsha tıptik jobadaǵy meshit ǵımaratyn salýdyń tártibin qalyptastyratyn negizgi qujat. Ereje QR «Dinı qyzmet jáne dinı birlestikter týraly» zańyna, «QR sáýlet, qala qurylysy jáne qurylys qyzmeti týraly» zańy men ózge de normatıvtik quqyqtyq aktilerge, sonymen qatar QMDB jarǵysyna sáıkes ázirlendi. Budan bylaı meshit ǵımaraty jergilikti jamaǵattyń sanyna oraı 3 deńgeıde salynady: aýyldyq (syıymdylyǵy 70-500 adam), aýdandyq (syıymdylyǵy 500-1500 adam), oblystyq, qalalyq (syıymdylyǵy 1000-5000 adam)», - delingen habarlamada.
Erejege sáıkes, bolashaqta jańadan salynatyn meshittiń qurylysy zamanaýı talapqa saı jáne ǵımarattyń kórikti bolýy shart. Meshit salýda zamanaýı ozyq úlgileri men Islamnyń jáne jergilikti sáýlet ónerin aıshyqtaryn paıdalaný mindetti. Odan bólek, meshittiń munarasy, kúmbezi jáne ishki-syrtqy bezendirilýi jergilikti dástúrge saı bolýy tıis.
«Sonymen qatar, qabyldaǵan qujat boıynsha, meshit jergilikti jamaǵattyń sanyna laıyqtap salynady. Buǵan qosa, meshit aýlasyna avtoturaq, saıabaq, t.b. qajetti nysandar turǵyzylmaq. Meshit qurylysyna sapaly jáne uzaq merzimge jaraıtyn materıaldardy paıdalaný talap etiledi. Qaýipsizdik sharalaryn saqtaý maqsatynda arnaıy qurylǵylar da ornatylady», - dep habarlaıdy QMDB.
Aıta ketsek, ótken jyly elimiz boıynsha 38 meshit paıdalanýǵa berildi. Al jalpy respýblıka boıynsha búginde 2 626 meshit halyqqa qyzmet etedi.
