Qazaqstandaǵy memlekettik qyzmetshilerdiń mansabynyń ósý kórsetkishi úsh esege artty

ASTANA. QazAqparat - Ótken jyly qazaqstandyq memlekettik qyzmetshilerdiń mansabynyń ósýi 2015 jylmen salystyrǵanda úsh esege joǵarylady. Bul týraly búgin Astana ekonomıkalyq forýmynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova málim etti, dep habarlaıdy QazAqparat.

«Qazaqstanda merıtokratııa ustanymyn tolyqtaı júzege asyrý úshin jaǵdaılar jasaldy. Ótken jyly árbir memlekettik organnyń ishinde tómennen joǵary laýazymǵa kóterilgenderdiń sany úsh esege artty»,-dedi ol forým aıasyndaǵy «Múmkindikterdi basqarý: kóshbasshylyqtyń jahandyq máseleleri» atty sessııa jumysynda.

Budan bólek Shaıymova álemdik úrdisterdi eskere otyryp, qazirgi kezde kóshbasshylyq máselelerin aıqyndaý ózekti bolyp otyrǵandyǵyn aıtty.

«Bul adamdar týyndaıtyn syn-qatarlerdi eńserýge qaýqarly. Adamzat tarıhynda shynymen de kóshbasshy dep ataýǵa laıyqty adamdar az bolmady, ıaǵnı Ýınston Cherchıll, Indıra Gandı, Djon Kennedı, Nelson Mandela sekildi qaıratkerlerdiń orny bólek. Bizdiń Prezıdent Nursultan Nazarbaevtyń kóshbasshylyq qasıeti men kóregendigi ıadrolyq qarýdyń damýynyń jahandyq qaterin aldyn ala boljaýǵa múmkindik berdi. Ózderińiz bilesizder, bizdiń eldiń áleýeti Frantsııa, Ulybrıatanııa jáne Qytaı sekildi memleketterdiń ıadrolyq áleýetinen basym boldy. Memleket basshysynyń saıası erik-jigeriniń arqasynda Qazaqstan synaq polıgonyn jaýyp, qarý arsenalynan bas tartty, sondaı-aq tómen baıytylǵan ýrannyń bankin quryp, qaýipsiz álemdi qoldaýǵa eleýli úlesin qosty»,-dedi ol.

Aıta keteıik, búgin bastalǵan Astana ekonomıkalyq forýmyna 100 elden 4 myń delegat qatysýda. Olardyń arasynda saıasatkerler, ekonomıster, qarjylyq jáne halyqaralyq uıymdardyń ókilderi bar.