Qazaqstandaǵy memlekettik baǵdarlamalar orta tap ókilderiniń sanyn arttyrýǵa baǵyttalǵan
ASTANA. QazAqparat - Qazaqstandaǵy memlekettik baǵdarlamalar orta tap ókilderiniń sanyn arttyrýǵa baǵyttalǵan. Mundaı pikirdi búgin «Qazaqstandaǵy orta tap ulttyq ekonomıkanyń qozǵaýshy kúshi retinde» taqyrybynda ótken sarapshylyq klýbtyń otyrysynda L.Gýmılev atyndaǵy Eýrazııa ulttyq ýnıversıtetiniń dotsenti Ramazan Salyqjanov bildirdi.
«Eń birinshiden, orta tap ókilderin tabysymen alyp qaraǵan durys emes. Ekinshiden, ár ulttyń, qoǵamnyń ózindik tanymynda erekshelikteri bar. Máselen, bizdiń elimizdi alar bolsaq, qazaq halqyna «shúkirshilik», «táýbeshilik etý» tán. Sońǵy zertteýlerimizdegi «Siz ózińizdi qalaı sezinesiz?», «Ózińizdi qaı tapqa jatqyzasyz?» degen saýaldarǵa halyqtyń basym bóligi ózin jaqsy sezinetinin, ózin orta tapqa jatqyzatyndyǵyn aıtty. Al aýyldaǵy orta tapqa jatatyn azamat pen qaladaǵy orta tap ókili jáne batystyń orta top ókilderi arasyndaǵy tabystary, kóńil-kúıleri ártúrli bolyp keledi. Demek, orta tap ókili degen kezde naqty el-jurttyń, qoǵamnyń, ekonomıkalyq jáne saıası jaǵdaıdyń erekshelikterin eskerýimiz qajet», - dedi ǵalym.
Onyń atap ótýinshe, orta tap ókilderi máselesiniń kún tártibine shyǵarylýy qoǵamdaǵy turaqtylyq máselesine baılanysty. Orta tap ókilderi neǵurlym kóp bolǵan saıyn qoǵam turaqty damyp, bıliktiń júrgizip otyrǵan baǵyty durys degen túsinik qalyptasady.
«Demek, eń birinshi kezekte, Qazaqstandaǵy orta tap ókilderi sanynyń kóbeıýine memleket múddeli. Sol arqyly bilimdi adamdardyń, ál-aýqaty joǵary adamdardyń sanyn kóbeıtý jolynda dep túsinýimiz qajet», - dedi ol.
Onyń aıtýynsha, qazirgi tańda elimizdiń orta tap ókilderiniń naqty sany belgisiz. Tipti, olardy anyqtaıtyn naqty ólshemder de anyqtalmaǵan. Al, orta tap ókilderine, basynda baspanasy, astynda kóligi bar, bala-shaǵasy men týǵan-týysyna qaraılasýǵa jaǵdaıy jetetin azamattardy jatqyzýǵa bolady.
«Jalpy, búgingi kúndegi memlekettiń saıasaty halyqtyń ál-aýqatyn kóterý kerek bolsa, meniń oıymsha, munyń astarynda halyqtyń orta tap ókilderiniń sanyn kóbeıtý dep túsinemiz. Demek, búkil memlekettik baǵdarlamalar orta tap ókilderiniń sanyn arttyrýǵa arnalǵan», - dedi R.Salyqjanov.
