Qazaqstandaǵy medıtsınalyq mekemeler tolyqtaı sharýashylyq basqarý quqyǵyna ótedi - vıtse-premer
ASTANA. Sáýirdiń 2-si. QazAqparat /Gúlmıra Álıakparova/ - Qazaqstan Úkimeti eldegi medıtsınalyq mekemelerdi tolyqtaı sharýashylyq basqarý quqyǵyna kóshirýdi josparlap otyr. Respýblıka Úkimeti ulttyq densaýlyq saqtaý júıesine engizýdi kózdep otyrǵan osy jáne basqa da jańashyldyqtar jaıynda búgin, mınıstrlikte ótken respýblıkalyq keńeste Premer-Mınıstrdiń orynbasary Erbol Orynbaev aıtty,
dep habarlaıdy QazAqparat.
E.Orynbaevtyń sózine qaraǵanda, medıtsınalyq mekemeler tolyqtaı sharýashylyq basqarý quqyǵyn alý úshin, olarǵa birqatar sharttardy oryndaý qajet. Aldymen, aýrýhanada densaýlyq saqtaý salasynyń ekonomıkasyn biletin menedjerler men bilikti býhgalterler bolý kerek. «Osy eki shart oryndalǵan jaǵdaıda, biz medmekemelerdi kezeń-kezeńimen sharýashylyq basqarý quqyǵyna aýystyryp, ózin-ózi basqarý erkindigin beretin bolamyz», - deıdi ol.
Ekinshiden, QR Úkimeti tarıfterdi jetildirý arqyly tozyǵy jetken qural-jabdyqtar men aǵymdaǵy jáne kúrdeli jóndeý jumystaryna ketken shyǵyndardyń ornyn toltyrýdy kózdep otyr. Bul baǵyttaǵy jumystar 2011-2015 jyldarǵa baǵyttalǵan Densaýlyq saqtaý baǵdarlamasynyń sońyna deıin tolyǵymen aıaqtalýy tıis. Sondaı-aq, onymen bir mezgilde qural-jabdyqtardy satyp alý lızıngisi engizilmek. Ol úshin eń aldymen, respýblıkalyq deńgeıde lızıngilik kompanııa qurylatyn bolady. ıAǵnı medıtsınalyq mekemelerdiń tapsyrystary negizinde memleket qajetti jabdyqtardy satyp alady, óz kezeginde mekemege ol jabdyqtar unaǵan bolsa, onda memleket olardy 10-15 jylǵa nesıege beredi.
E.Orynbaevtyń aıtýynsha, medıtsınalyq uıymdar bul jerde jabdyqtardyń ekonomıkalyq jaǵynan tıimdi bolýyna nazar aýdarýy tıis. «Biz Ulttyq medıtsınalyq holdıngin qajetti barlyq jabdyqtarmen jaraqtandyrdyq. Biraq búgingi kúni ol jabdyqtardyń teń jartysy qoldanylmaı, bosqa tur. Osy rette Medıtsınalyq holdıng úlken shyǵyndarǵa batyp otyr. Sondyqtan, jabdyqtardyń qajet ne qajet emestigin ózderińiz sheshetin bolasyzdar. Olar úshin shyǵyndardyń ornyn sizderge eshkim toltyryp bermeıdi. Barlyq shyǵyndy emhanalardy jaýyp, jyl sońynda yqshamdaıtyn bolamyz», - deıdi ol.
Sondaı-aq, aldaǵy ýaqytta jumys nátıjeleriniń reıtıngisin engizý jáne barlyq medmekemelerdegi qujat aınalymdy kompıýterlendirý josparlanýda.
