Qazaqstandaǵy medıtsınalyq bilim berýdi túbegeıli jańǵyrtý qajet - D. Nazarbaeva
ASTANA. 20 aqpan. QazAqparat - Qazaqstanda medıtsına salasynyń qyzmetkerlerin daıarlaý júıesi túbegeıli ózgerýi jáne halyqaralyq standarttarǵa saı bolýy qajet.
Búgin QR Parlamenti Májilisinde «Salamatty Qazaqstan» memlekettik baǵdarlamasynyń iske asýynyń birinshi jyldyǵyna arnalǵan Úkimet saǵatynda depýtat Darıǵa Nazarbaeva osylaı málim etti.
«Qabyldanǵan sharalarǵa qaramastan, medıtsınalyq bilim jáne ǵylym salasynda kadr daıarlaýdyń sapasy men jumys isteıtin mamandardyń biliktilik deńgeıi negizgi problema bolyp qala beredi. Bul rette medıtsınalyq bilim beretin, medbıkelerdi daıarlaıtyn jáne qaıta daıarlaıtyn bizdiń júıemiz túbegeıli jańǵyrtýdy qajet etedi», - deıdi depýtat.
«Búgingi kúni ásirese emhanalyq jáne aýdandyq aýrýhanalar deńgeıindegi medıtsınalyq qyzmet sapasynyń deńgeıi óte tómen. Bul medpersonaldy daıarlaýdyń bazalyq deńgeıiniń tym tómendigimen baılanysty. Olar dıagnostıkanyń, emdeýdiń, jańa tehnologııalardyń halyqaralyq standarttary týraly zamanaýı bilimge ıe emes, aýrýlardy qaraý prıntsıpteri men medıtsınalyq etıkasy da tómen», - deıdi D. Nazarbaeva.
Onyń paıymdaýynsha, elimizdegi medqyzmetkerlerdi daıarlaý júıesi sapaǵa emes sanǵa baǵdarlanyp otyr. Bul rette depýtat, damyǵan elderdegi tájirıbelerdi alǵa tartty. «Olarda medıtsınalyq bilim berý ishinara nemese tolyǵymen aǵylshyn tilinde júredi, óıtkeni zamanaýı jańalyqtar da, qazirgi ǵylymnyń jetistikteriniń bári de, standarttary da osy tilde taralady. Al medıtsınalyq JOO-larǵa 150-200 adamnan artyq qabyldanbaıdy, bul dárigerlerdiń sapaly bilimine de áserin tıgizedi. Sonymen qatar, álgindeı JOO-nyń bárinde ýnıversıtettik klınıkalar barshylyq, onda stýdentter ǵylymmen aınalysady. Jalpy osyndaı halyqaralyq standartty qaǵıdatty túrde engizbeı salada alǵa jyljýshylyq bolmaıdy», - deıdi ol.
Bul rette D.Nazarbaeva, medıtsınalyq qyzmetkerlerdi oqytýdy jańǵyrtý sharasynyń aıtarlyqtaı bıýdjet qarajatyn talap etetinin de atap ótti. Al qarajatty maqsatty ári tıimdi paıdalanyp, nátıjeli josparlaý qajet. Onyń aıtýynsha, búgingi kúni mıllıardtardy jumsap, aldyńǵy qatarly qondyrǵylar satyp alynǵanymen, mamandar sáıkesinshe bazalyq daıarlyqtan ótpese, «aqsha jelge ushqanmen teń».
«Búgingi kúni shynymen elimizdiń densaýlyq saqtaý salasy zamanaýı tehnologııalarmen jaqsy jabdyqtalyp keledi. Ókinishke qaraı, ásirese aýyldyq óńirlerdegi dárigerler jańa qurylǵylarmen jumys isteı almaıdy», - dedi D. Nazarbaeva.
