Qazaqstandaǵy McDonald's jumysyn qaıta bastamaq

ASTANA. QazAqparat – Saýda jáne ıntegratsııalar mınıstrligi Qazaqstandaǵy McDonald's meıramhanalarynyń jumysyn qalpyna keltirý máseleleri boıynsha keńes ótkizdi, dep habarlaıdy QazAqparat tilshisi.

Jıynǵa Qazaqstandaǵy McDonald's basshylyǵy, memlekettik organdar, «Qazaqstannyń Et odaǵy», «Qazaqstan qus ósirýshiler odaǵy» ókilderi kelgen.

«Kompanııa elimizdiń naryǵynda qyzmetin jalǵastyrýdy josparlap otyr jáne meıramhanalardyń jumysyn qalpyna keltirýde. Jyl sońyna deıin alys jáne jaqyn shetelderden júkter keledi. Kedendik tazartý protsesi ókinishke oraı, bir aptaǵa deıin uzaq ýaqytty alady. Kedendik tazartý protsesin barynsha jedeldetýge qoldaý kórsetýińizdi suraımyz», - dedi «Food Solutions KZ» JShS (Qazaqstandaǵy McDonald's) Bas dırektory Áset Mashanov.

Óz kezeginde memlekettik kirister komıtetiniń ókilderi fıtosanıtarııalyq sertıfıkattar men sáıkestik sertıfıkattary sııaqty ýákiletti organdardan ruqsat berý qujattary bolǵanda ǵana járdem kórsetýge daıyn ekenin jetkizdi.

Sonymen birge, jıyn barysynda ımportty almastyrý máselesi de kóterildi. Qazaqstannyń et odaǵy, Qazaqstan qus ósirýshiler odaǵynyń, Qazaqstannyń sút odaǵynyń ókilderi Qazaqstandaǵy McDonald's-qa ımporttyq taýarlar ornyna óz ónimderin usyndy.

Bul saýalǵa Áset Mashanov otandyq ónimdi paıdalanýǵa daıyn ekenin, qazaqstandyq óndirýshilermen kelissózderdi bastap ketkenin aıtty.

«McDonald's-tyń barlyq ónimderi óndiristiń joǵary sapa talaptaryna saı bolýy kerek. Qazaqstandyq óndirýshiler úshin yntymaqtastyq McDonald's seriktesi bolýdy bildiredi jáne halyqaralyq deńgeıge, basqa elderdiń naryǵyna shyǵýǵa múmkindik ashady. Qazir birneshe jergilikti óndirýshilermen jumys istep jatyrmyz jáne olardan McDonald's standarttaryna sáıkes keletin shıkizatty alamyz. Sondaı-aq qazir qazaqstandyq qus jáne sıyr etin óndirýshilermen kelissózder júrgizip jatyrmyz», - dedi Áset Mashanov.

Mınıstrliktiń habarlaýynsha, keńes sońynda atalǵan máselelerdi sheshý úshin jol kartasy daıyndalyp, ár másele boıynsha kýratorlar taǵaıyndalǵan.

Aıta keteıik, qarasha aıynda McDonald's jetkizý jumystaryna baılanysty Qazaqstandaǵy barlyq meıramhanalaryn ýaqytsha japty.

Bul kompanııa Qazaqstanda 6 jyldan astam ýaqyt jumys istegen. Almaty, Astana, Atyraý, Aqtóbe, Qostanaı, Qaraǵandy qalalarynda kompanııanyń 24 meıramhanasy bar jáne olarda 2000-ǵa jýyq adam jumyspen qamtylǵan bolatyn.