Qazaqstandaǵy mamandandyrylǵan HQO sheteldikterdi tańdaı qaqtyrdy

ASTANA. QazAqparat - Astex halyqaralyq konferentsııasynyń sheteldik qonaqtary Qazaqstanda adam praktıkalyq jáne teorııalyq emtıhandy tapsyryp, birden kýálik alatyn, sondaı-aq avtokóligin tirkeı alatyn mamandandyrylǵan ortalyqtyń jumys isteıtinine tań qaldy.

«Júrgizýshi kýáligin alý úrdisi bizdiń úrdispen (amerıkalyq) óte uqsas, biraq dál mundaı jaıly emes. Bizde de bári jyldam, biraq bizde júrgizýshiler birden kýálikke emtıhan tapsyryp, sol sátte ony ala alatyn mundaı halyqqa qyzmet kórsetý ortalyqtary joq. Menińshe, ómirinde birinshi ret júrgizýshi kýáligin almaqshy bolǵan jastar bul jerde ózin jaıly sezinetin sııaqty. Bizde Amerıkada mundaı mamandandyrylǵan HQO-ny tek armandaı ǵana alamyz», - dep atap ótti elektrondyq kommertsııa salasyndaǵy halyqaralyq konsýltant Erık Shternbah.

Onyń aıtýynsha, halyqtyń ózi qyzmetti ala alatyn óz-ózine qyzmet kórsetý buryshy qatty áser qaldyrǵan. «Osy ıdeıalaryńyzdy biz de qolǵa alýymyz qajet sııaqty», - dedi ol.

Elektr tehnıkasy men elektronıka ınjenerleri ınstıtýtynan kompıýterler qoǵamynyń prezıdenti Alan Grıer óz áriptesterimen salystyrǵanda, qazaqstandyq mamandandyrylǵan HQO-dan erekshe eshteńe baıqamady. «Munda bári de Kolýmbııadaǵydaı, tek jaıly ekeni ras», - dep atap ótti Grıer.

Belgili ońtaılandyrýshy, avtomobıl satý boıynsha iri amerıkalyq portaldyń negizin qalaýshy Robert Bellak bıznes-protsesterge basa nazar aýdardy, ol «bıznes-protsesterdi ońtaılandyrý turǵysynan praktıkalyq kýrs alýdyń avtomattandyrylǵan júıesi - óte tabysty sheshim» ekenin aıtty. Sonymen qatar QR Baılanys jáne aqparat agenttigi tóraǵasynyń birinshi orynbasary Sáken Sársenov praktıkalyq emtıhan tapsyrýdyń avtomattandyrylǵan júıesi protsestiń ashyqtyǵyn arttyrý jáne sybaılas jemqorlyq qarsy quqyqbuzýshylyqtary úshin alǵysharttardy týdyrmaý úshin de engizilgenine toqtalyp ótti. Sondaı-aq S.Sársenov aǵymdaǵy jyly «Aqparattyq Qazaqstan-2020» memlekettik baǵdarlamasyn iske asyrý josparyna sáıkes Qyzylordada, Pavlodarda, Petropavlda jáne Taldyqorǵanda, al 2015 jyly Aqtóbede, Atyraýda, Kókshetaýda, Qostanaıda, Oralda, Óskemende jáne Shymkentte mamandandyrylǵan HQO ashylady dep josparlanyp otyrǵanyn jetkizdi.

Aıta keteıik, Alan Grıer, Robert Bellak pen Erık Shternbah Astanada 19-20 mamyr aralyǵynda ótken «Astex-2014» halyqaralyq kórme-konferentsııasyna qatysqan bolatyn.